‘Ops Sarang’ nakaanu minamagakom papatayad, limo panagi dadah om minamagahau motosikal pinanakau
KOTA BELUD: ‘Ops Sarang’ kolimo Longkod Upis Pulis Watas Kota Belud nakaanu minamagakom songulun papatayad dadah, limo panagi om songulun kusai kinoiyonon kiumur 38 toun ih kikotumbayaan do nokoompit minanakau motosikal id Masjid Pekan hiti, di kawawagu.
Boyoon Pulis Watas Kota Belud Supt Mohd Zaidi Abdullah minoboros do operasi dilo pinapanau di toinsanan raan IPD Kota Belud miampai pinitambaan bogian Agensi Anti Dadah Kabansaan (AADK) di tadau Koonom nakatalib.
“Operasi dilo tuminimpuun jam 2 gisom 10 kosuabon ih kopoompit do piipiro kampung. ‘Ops Sarang’ dilo nakaanu minamagakom songulun papatayad om limo panagi om songulun kagu sabap kikotumbayaan do nokoompit miampai kes manakau motosikal sanganu sosongulun do naamot sumambayang Magrib id Masjid Pekan di minggu nakatalib,” ka disio.
Tumanud disio ontok pinapanau ‘Ops Sarang’ nakapamagahau nogi pulis do 5.08 gram dadah kikotumbayaan syabu, iso motosikal Demak 125cc om iso dangol tanaru ih nosimbanan noh.
Papatayad dadah dino soriukon tumanud Seksyen 39A(1)(a) ADB 1952 om Seksyen 15(1)(a) om limo tulun kagu soriukon tumanud Seksyen 3(1) APD 1983 (Pongubatan om Pongolingosan) mantad bogian AADK.
Minoboros Zaidi do songulun kusai kagu ih nagakom sabap kiharo iso dangol tanaru ih nosimbanan noh om kikotumbayaan nokoompit kes manakau motosikal soriukon tumanud Seksyen 7(1) Akta Bakaang Momiraag om Pongobusan Sinjata Koligogon om Seksyen 379 A Kanun Koinggoritan.
Ka dau operasi dilo maan potilombuso montok mongipop kaparagatan dadah om mongingkudi do kes koimaan taraat hiti.
Idsuang ahal dilo, pokionuon disio o tulun togumu tuh manahak sokodung miampai manahak kopoilaan nunu noopo kaparagatan koimaan taraat kumaa kokuasaan pulis montok laang potilombus montok kolumaagan om kotoonongan tulun ngawi songkoiyonon.