Musa: Porinta monginsonong 30 lamin monginsada id Kampung Pulau Nunuyan

SANDAKAN: Kiginumu 30 lamin monginsada id Kampung Pulau Nunuyan doros hiti, maan insanangai montok papatantu do poingiyon lamin dilo koiyon id koiyonon di tosonong.

Boyoon Montiri Datuk Seri Musa Aman pinoboros do ahal dilo id Abaabayan Kapanahakan Sakadai Zakat Ramadan kuminaa 1,385 mogigion id pulou dilo, koniab.

Minoboros isio do noolu lamin ih momoguno do pongumbasian id pulou dilo maan papanao kalapas 30 lamin ih umbasian dilo opongo momonsoi.

“Iti noh ralan tokou manalasai do kobolingkangan rayat ih pinosuul kumaa momuruan maya do abaabayan mindahu gana (minsuang kakampungan) mokinongou ahal rayat.

“Iti nogi laang porinta ih nigitan do Barisan Nasional (BN) ih toririmo kopuriman om koilo kokomoi kogunoon rayat,” ka disio.

Suai ko ilo, minoboros ih Musa do kopongoputan paip waig suriba daat kumaa id pulou dilo om kapanahakan winakas lotirik maan posikapo montok momogonop do kogunoon tagayo mogigion.

Ka disio montok montok kopongoputan paip waig suriba daat mantad bogian Sandakan pakaayan id pulou dilo, nokosuul noh porinta ahal dilo kumaa Komontirian Labus Kakadaian om Watas montok posikapon.

Kampung Pulau Nunuyan kiharo 20 minit mindalanan sumakai bot mantad Kakadaian Sandakan, om haro 1,300 mogigion ih kogumuan diolo pakaraja sabaagi monginsada miampai kogumuo lamin kiginumu 164 tinan.

Pogului, Boyoon Longkod Watas Mongundi Kampung Pulau Nunuyan Gapor Daud id oason dau mokianu porinta mongumbasi pipiro lamin mogigion id kampung dilo ih momoguno do pongumbasian.

Noboros disio do kogumuan lami dilo nasanganu monginsada ih tadon konuonuan au atantu sabap lumansan doid asil daat.