Kempen ‘Bawa Beg Bah’ tumimpuun 1 Ogos - Masidi
KOTA KINABALU: Kempen 3B toiko ‘Bawa Beg Bah’ maan papanao tumimpuun 1 Ogos diti kigaab montok mongunsub do tulun togumu mogowit kantung toiko barait/ bakul sondiri soira momoli barang, ka di Montiri Ponombuluian, Koubasanan om Kinoiyonon Posorili Sabah Datuk Masidi Manjun.
Minoboros isio do kempen 3B nopo nga laang tosonong Dewan Bandaraya Kota Kinabalu (DBKK) montok momungaran kawagu kempen kopongingkudian kopomogunaan beg plastik ih pinotimpuun di ontok 7 Jun 2010, om kempen dilo maan papanao ontok tadau Koonom, Tadau Minggu om tadau Koiso.
“Pinoilo oku do kiharo 384 premis poniagaan ih nokoumbal tuminanud kempen pogului diti om alansan kopio oku do insan poh kagu iyolo monokodung om tumanud do kempen diti montok popoingkawas do kopurimanan momoguno montok mongunsub kopomogunaan otomou maya ralan tonudon 3R ilo nopo nga ‘Reduce, Reuse om Recycle’ (Ingkudian, Gunoon Kawagu om Pusingon kawagu).
“Ontok tadau kempen diti papanaon, momoguno kabarai (caj) 20 sen montok kopomolian potitikid beg plastik. Caj diti okon kitujuan maganu kountungan mantad beg plastik katapi montok manahak do gatang kumaa beg plastik dilo sondiri tuh ilo gunoon kawagu om au papataam tumanud ginawo sondiri noopo.
“Caj dilo puhuon di Komiti Laang Kinoiyonon Posorili Kota Kinabalu ih torinaon DBKK om asil pinomuhuan gunoon montok pongobi do projik ngawi kinoiyonon posorili,” ka dau id pinoimaganan Kempen ‘Bawa Beg Bah’ om ‘Bandaraya Bersih, Komuniti Sihat’ pinanjur Hospital Gleneagles Kota Kinabalu miampai pinisokodungan DBKK kopinamot Pangaramitan Tadau Kinoiyonon Posorili Sompomogunan hiti koniab.
Teks pason dau binasa di Panakadai Montiri Ponombuluian, Koubasanan om Kinoiyonon Posorili Sabah Datuk Kamarlin Ombi. Nokotindapou nogi ih Mayor Bandaraya Kota Kinabalu Datuk Yeo Boon Hai om Boyoon Upisor Eksekutif Hospital Gleneagles Kota Kinabalu Jean-Francois Naa.
Angatan di Masidi o tulun togumu monokodung kempen dilo montok monulung monorini do kopomogunaan kotos kinoiyonon om mongingkudi do pangayamutan kinoiyonon posorili.
Id ramai dilo, suminaasi nogi ih Kamarlin do abaabayan suminais Surat Pihubayaan (MoU) montok abaabayan ‘Bandaraya Bersih, Komuniti Sihat’ pialatan Hospital Gleneagles Kota Kinabalu om DBKK, ilo nopo nga abaabayan ‘angkat’ momorisi do parit ngawi om bogian posorili lamin pongusapan mooi koidu mantad siyamut.
Abaabayan kopomorisian dilo papanaon potitikid tolu wulan ilo nopo nga ontok tadau Koonom minggu koduo.
Id ahal dilo, pokionuon nogi DBKK kumaa bogian orohian montok misokodung miampai diolo idsuang ahal kapadtamangan koborisian sabaagi laang popoingkawas do ‘imej’ om ‘identiti’ kakadaian tagayo Kota Kinabalu sabaagi kakadaian tagayo di oborisi, otomou om osonong montok iyonon. -Bernama