Pulis minanaan minamagamu lantai amas munggui
KOTA KINABALU: Songuhun kusai tuhun songkosuvazan di aiso suat kointutunan tinan tinaan pulis kahapas minamaga’au lantai amas songuhun mongungubat id doumbangan iso bank id Lahan Lintas Luyang, doiti di tadau Koiso nakatahib.
Kinantakan id jam 9.16 kosuvabon dino nantakan do naamot munggui masaon poingkakat id doumbangan bank dino nokomoi montok magandad timpu iho ukabon poguhui mokitoina mongohon kad Mesin Pogonuan Usin Automatik (ATM) disido.
Huguan Pulis Uvang Kota Kinabalu Asisten Komisoner M Chandra minoboos do ‘suspek’ kiumul 23 toun ih minindahu mantad tukad id nuhudan hinominon songindoos id koozuvon moosi-osi kahapas dino minamanau mantad douvi munggui om minamagamu lantai amas munggui poguhui minogidu.
Ka disido mintamong koumohigan ih nokoongou pinomogizakan munggui kahapas dino minomogusa suspek, nga au nakaanu minamagakom suspek ih minogidu doid soboong talun alun.
“Ontok timpu iso’i, saksi ih minintong kinantakan minomogizak om noihaan di mintamong koumohigan ih kivaa id hinominon suvai poguhui minanaan suspek ih minogidu id boogizan dau.
“Suspek kahapas dino novit doid Balai Polis Kota Kinabalu di sontimungan Unit Mimpanau Kimotosikol (URB) ih pinoiho kokomoi do kinantakan,” ka disido.
Minoboos Chandra do lantai hizou munggui kihoogo RM4,000 ih pinataak kumaa savo munggui kahapas dino pinataak doid boogizan pulis sabaagi balang kes montok haang potihombus.
Tumanud disido suspek ih nuudizo monoizuk nokotumbozo minamaga’au munggui sabap aiso usin. Kes diti soizukon tumanud Seksyen 392 Kanun Koundosoan.