Ponulung Injinio JKR tinantandasan nakasala momoguno kuasa

KOTA KINABALU: Songulun Ponulung Injinior Koupisan Talun Alun (JKR) pinotoguang id Kuut Sesyen Poimbida Susuap hiti, koniab sabap tinandasan nakasala minomoguno do korikohonon dau idsuang ahal kapanahakan karaja ngawi koponorinaan talun alun id Tuaran.

Chong Ming Hiong, 59,ih pakaraja id upis JKR Tuaran om kitonggungan sabaagi Ponorikohon Komiti Pamagatangan Mamarait Gatang, kotumboyo au kasala kalapas panandasan binasa id toguang Hakim Abu Bakar Mamat.

Dinawa isio nokoompit pinopotimboyo do atag pomilian komponi JR Enterprise ih nasanganu tanak dau montok kapaganu karaja ponorinaan Ralan Hamad Kitapol Kilometer1.40 - Kilometer 6.80 kigatang RM49,200 ontok 29 Oktober 2010 id upis JKR Tuaran.

Natandasan, ih 30 toun noh poingkaraja miampai JKR, tinandasan minomonsoi kasalaan dilo tumanud Seksyen 23(1) Akta Tinan Monorina Pomunsaan Susuap Malaysia 2009 ih kopogowit ukuman jiil gisom 20 toun om danda au okurang inlimo kogumu ginumu toiko gatang pinonuapan toiko RM10,000 tumanud nonggo-nonggo di lobi akawas.

Chong, ih linansanan luyar Dominic Chew Ban Huat, pinoidu miampai kogos jamin RM10,000 om songulun panjamin kinoiyonon.

Sinuhu nogi ih natandasan papatahak do pasport dau kumaa kuut om poporuput tinan id upis SPRM songindoros tikid wulan.

Pinatantu di Abu Bakar ontok 26 Julai tabantalan montok ponorinaan kwagu kes dilo.

Pangadawaan papanaon di Kumoduo Mangadawa Tagayo Rustam Sanip.Bernama