Koubasanan KDM id pogun suvai, SAUK minanganjul Kaamatan UK
tu osodu id pogun suvai montok mogium kaakan-akanon id suvang kopoposizon, koubasanan pinotungkusan (turun monurun) tuhun ngavi Kadazan Dusun Murut (KDM) tatap ogiot id tinan tuhun ngavi Sabah id United Kingdom (UK).
Iho otopot kozo songian sontimungan tuhun ngavi Sabah id UK nokoponoodo no ‘Sabahan Abroad UK (SAUK) om minangazu do Tadau Kaamatan id Chieveley ontok 3 Jun 2017.
Puu SAUK Leorita Joseph Henry minoboos do sundung tu izioho osodu mantad pogun kinosusuvon, nga kaadat-adaton ih binalajalan dino tantu oviton doid nombo noopo.
“Osodu dati izikoi mantad Sabah, nga tivou koupusan dagai doid kaadat-adaton om koubasanan ih binalajalan mantad tinungkusan poinsuvang id ginavo.
“Miampai pinopotimpu do piipio tambahut montok monoodo Komiti Kalaja Tadau Kaamatan UK diti, nakaanu izikoi minangazu do abaabazan diti id Chievely Village Hall.
“Kinahantazan diti nokopokito do kiikila 100 layat Malaysia hoohobi kozo mantad Sabah ih poingizon id UK toi pogun suvai nokoikot songovian ngavi minamalamai do Tadau Kaamatan diti,” ka disido.
Ka disido iman-imanon kapapanjulan kalamazan dino nopo nga montok monokodung layat Sabah ih suvai, mongunsub pisaan id piahatan dosido om manaak do kopiumanan koubasanan hoohobi kozo doid sinakagon tomuhok maza mogikaakavo abaabazan di papanaon.
Tumanud disido SAUK pinapanau do mogisusuvai abaabazan poompus kalamazan dino pinapanau kaamung no piboi’an mipulos montok boogizan dazanak om nosukod.
“Abaabazan sazau ngavi koubasanan iho nopo nga sumazau om magunatip nakaanjul nogi. Pinoposodia nogi izikoi do taakanan koubasanan kaanangan dagai miaga hinava, bambangan om tuhau om piompoton humozou do hozou ngavi Kaamatan montok mamalamai vagu koozuvon,” ka disido.
Sabaagi iso koubasanan, pinoposodia nogi izioho do tiinumon koubasanan tuhun ngavi KDM iho nopo nga lihing ih sinakadai di Tobpinai Stephen Chin mantad Kota Kinabalu montok monoimo do koikotan tombuhui ngavi.
Minoboos zi Leorita do sabaagi abaabazan kohimpupuson, minanganjul nogi izioho do piboi’an UndukNgadaumontokpopotihombus do koubasanan tototopot Kaamatan.
Id piboi’an dino, Tati Kelly Joeman ih natadon mantad London nopihi sabaagi ‘Unduk Ngadau’ Kaamatan UK.
Namot dino, nokotindapou nogi nga pinohiis di songuhun dazanak kivaa kobulihan mamain do kakamot tuunizon ‘ukulele’, isido nopo nga zi Maya Linawa, 10, ih minogovit hozou ‘Tomoimo Ondom Ku Iziau’ iho nopo hozou haid di tiagak Lucy Sikuat.
Iso vagu abaabazan koimpupuson ontok sodop dino nopo nga pokitonan koubasanan ih minamagazat Tinimungan Kulintangan UK id nombo pinopokito do sazau koubasanan tototopot tuhun ngavi Penampang om Papar winozo miampai sazau Magunatip.
Sumusuut kinahantazan pinanganjulan kalamazan dino, kikahansanan kozo zi Leorita do abaabazan dino nokomoi kaanu popotihombus ontok timpu mikot miampai hobi agazo, au mongio tinau om agama.