SPRM pinopointarang tolu ruputan # Monorimo susuap mantad kuntirikto, manahak kuntirik kumaa puru paganakan om momonsoi tuntutan au otopot
KOTA KINABALU: Tinan Monorina Pomunsaan Susuap Malaysia (SPRM) Sabah pinopointarang do tolu kasalaan susuap di asasaru poruputon kumaa diolo kopoompit do puru ngawi balajaran id Sabah doulu noh ‘pengetua’ om ‘guru besar’ sikul.
Kumoduo Potunud (Operasi) SPRM Pogun Karunanithy Y. Subbiah minoboros do ruputan dilo kopoompit do ponorimaan susuap mantad poposodia toiko kuntirikto, kasala momoguno korikohonon miampai manahak do kuntirik kumaa puru paganakan tosomok kopio om momonsoi tuntutan pilasu (au otopot) montok karaja kapanahakan di au pinapanau poimponu.
“Pokionuon ku o toinsanan monorina sikul tuh mongintong tototopot ahal diti om mokianu mooi au koompit miampai karaja ngawi irad dilo,” ka dau id abaabayan suminain ‘Ikrar Bebas Rasuah’ (IBR) Koupisan Balajaran Pogun Sabah (JPNS) hiti koniab.
Alansan nogi ih Karunanithy tuh sumumpa ih pinisainan dilo torimoon poimponu di puru ngawi JPNS om maganu laang popoidu tinan mantad kopongubasanan susuap om kasalaan momoguno kuasa.
Potunud Balajaran Pogun Datuk Maimunah Suhaibul minoboros do kiginumu 36 upisor ponorinaan poingkakawas JPNS suminain do IBR om puru ngawi Upis Balajaran om ponorinaan sikul id bogian watas posodia nogi momonsoi ahal irad dilo idsuang timpu tosomok.
“Alansan kopio o JPNS tuh toinsanan upisor kaanu papanau karaja miampai noponu ‘integriti’ om ‘akauntabiliti’ om nogi kotopotan om koidu mantad nunu noopo kasalaan momoguno kuasa om koimaan taraat susuap,” ka dau. Bernama