Musa: Pouhanon kalaja tototopot Umno om BN gisom kahantoi
LAHAD DATU: Popouhan kalaja tototopot Umno om Barisan Nasional (BN) mositi podimpoton songovian tu kotihombus manakadai kotundunan layat, ka di Vozoon Montili Datuk Seri Panglima Musa Haji Aman.
Minoboos isido ‘resepi’ pakalaja di kiasil nogi mositi poingkavason mooi padamaan parti montok mongumohig layat kaanu popohumaag saavi-avi layat.
Kuangon mimboos, pogumuon kumalaja... kuangon tokou mimpulitik om ‘polemik’, onuan pongintongan montok kumalaja om kumalaja mongumohig layat,” ka disido.
Teks pason dau pinohombus di Huguan Umno Boogizan Kalabakan Datuk Seri Abdul Ghapur Salleh id Abaabazan Iftar Ramadan Umno Zon Enam id natad Masjid Ar-Raudah, doiti, koniab.
Musa ih nogi Poniikon Tinan Pituubungan Umno Sabah minoboos do nopo nga kiguno kozo papavakas do pisaan om kosompuuvan om ‘solidariti’ id toinsanan boogizan kompomuu’anan parti id laan, boogizan, pahapa parti om injin gamut sakot.
Ka disido, onu noopo ponokiahitan di toguvangon idsuang parti, puu Umno om BN mositi kotumbozo ahal dino kaanu monguhan om salasazon miampai tavaavasi kosudong miampai sunduvan Umno di tototopot.
“Mantad podi timpuunon pinonuidongan parti gisom baino, Umno nnokotoguvang nio mogisusuvai ahal, nga kaanu manalasai miampai kivaa o koupusan om kopotopotan doid padamaan parti om momuu’an,” ka disido.
Mokianu nogi disido pisokodungan om pisaan id piahatan puu om kouvang parti komponen tumihombus poingkavason katanud miampai kahansanan Huguan Montili Datuk Seri Najib Tun Razak.
Mimang isido do momuu’an om hansanon layat tomoimo mindahu gana, au mokimaamaha do ‘gelaran’ montok papanau do tonggungan kopomuu’anan sabap ih kiguno kozo om gatang nopo nga kalaja, tohuod om vinasi kotoinaan kumaa layat.
Id abaabazan dino, Potunud Urusan Kumpulan Sawit Kinabalu Datuk Othman Walat pinapataak do ‘replika cek dividen’ kihoogo RM4,898,020.80 kumaa momukabun ngavi toniini Bagahak om RM531,174.40 mantad Kabun PPRT Sawit Kinabalu Sdn Bhd kumaa Konsol Uvang Lahad Datu montok pibobohogizon kumaa ponoimo.
Nakataak nogi, tohuod Hongkod Zakat Pogun tohuod ‘asnaf’ om tohuod tindalam raya kumaa Esscom ih sinaasi di Huguan Umno Boogizan Silam Datuk Yusof Apdal, Huguan Umno Boogizan Tawau Datuk Tawfiq Abu Bakar Titingan om Ponovohi naamot Huguan Umno Semporna Datuk Seri Nasir Tun Sakaran.
Abaabazan dino nogi notindapou di Kumoduvo Huguan Kopoihaan Umno Sabah ih nogi Puu Hamin Koundangan Pogun (Adun) Bugaya Datuk Ramlee Marhaban, Speaker Hamin Koundangan Pogun ih nogi Adun Balung Datuk Syed Abas Syed Ali, Adun Sebatik Datuk Muis Pichu, Huguan Boogizan Umno Batu Sapi ih nogi Adun Sekong Datuk Samsudin Yahya om Panakadai Montili Kopolintaan Kinoizonon om Pomuhaminan ih nogi Adun Gum-Gum Datuk Zakaria Mohd Edris.