Duo kusai kisinjata samurai minananggoi tondu tinaan pulis, padsakaian nahau nogi
KOTA KINABALU: Duo kusai kisinjata samurai ih minananggoi songulun tondu id Bulatan Bunga Raya Ralan tun Fuad Stephen id jam 3.20 minsusuab tadau Minggu nakatalib nakaanu minanaan di sontimungan pulis okurang sojam kalapas kinantakan dilo.
Boyoon Pulis Watas Kota Kinabalu Asisten Komisioner M Chandra minoboros do goduo-duo suspek di aiso kad kointutunan tinaan kiikira jam 4 minsusuab kalapas dilo id iso bogian poundorongan padsakaian poingoros Kompleks Pisompuruan Koporintaan Pogun Sabah.
“Kinantakan timpuuni nantakan soira munggui kiumur 20 toun songowian tolu kagu tambalut kusai dau id pindalanan muli kalapas makan kosuabon (sahur) id Taman Teluk Likas.
“Soira nokorikot id tampat kinantakan, korita ih sinakaian munggui tigog do nantaban di iso korita kawo Perodua Alza pogului duo kusai luminabus mantad korita dilo.
“Ontok timpu iso’i, songulun kagu tambalut munggui ih suminakai padsakaian misusuai om kiharo id tohuri korita munggui minaganu laang luminintuhun mantad korita dau montok mongilo onu ih nantakan,” ka dau.
Noboros di Chandra do soira nokoilo do kinorikotan tambalut munggui, suspek kalapas dilo pinapalabus iso samurai om minanangod daa disio minomoguno sinjata dilo.
“Minintong koyuon dilo, tambalut munggui om tolu tambalut kusai dau ih songowian ngawi suminakai korita dau minaganu laang minogidu om pinotongkiad munggui osongulunan idsuang korita.
“Kalapas au nakaanu minomogusa tambalut munggui, suspek kalapas dilo minamabak soromin korita tambalut munggui om pinopogidu kunsi korita dau pogului minananggoi munggui miampai korita dau,” ka disio.
Minoboros isio do tambalut munggui suai ih rinomut kalapas dilo nokorikot montok monulung pogului minoi id Balai Polis Kota Kinabalu montok momonsoi ruputan pulis.
“Minaganu laang maya kopoilaan di notorimo, sontimungan puru pulis kalapas dilo pinapanau karaja mogium. Okurang sojam kalapas kinantakan, dio suspek dino nokomoi nakaanu minanaan id iso bogian poundorongan padsakaian poingoros Kompleks Pisompuruan Koporintaan Pogun Sabah.
“Nakapamagahau nogi pulis do korita ih sinakaian suspek, Proton Saga sanganu munggui, iso samurai kitukuan 44 sentimeter kaamung tulu om sontimungan kunsi korita.
“Goduo-duo suspek ih noilaan nawuk ontok kinantakan noriman gisom 22 Jun om kes diti soriukon tumanud Seksyen 395/397 om 365 Kanun Koinggoritan,” ka dau.