14 tuhun kampung nokito katapi nouzan
KINABATANGAN: Mogigiium ontok June 26 nokokito dii 14 tuhun kampung mantad kampung Paris Satu i nokoluput natagak kahapas minugad id Kokozuvan Pinoobi Ulu Segama.
Huguan Pulis Supt A. Sahak minoboos ino 14 tuhun kiumul id piahatan 20-58 toun, nokito id duvo tampat misuvai.
I nopo koiso himo kusai nga minugad doid kokozuvan pinoobi, kiikila 35 kilomitol mantad Kampung Paris Satu, nga nokito id Balat Estate, doid 10.15 doungosuvab.
Nokoluput izioho do natagak kahapas au nokoguhui id hamin dioho mantad minongintous is Bavang Bilong, Kokuzuvan Pinoobi Ulu Segama, ontok June 21.
Naamot, i sizam suvai tuhun kampung i minoghium dii himo tuhun ontok June 23 nga nokito nogi doid 1.20 minsosodop id Hongkod Sitisin Kokozuvan Pinoobi Ulu Segama.
A. Sahak minoboos ontok June 25, sitisin pulis Kinabatangan nokotoimo iso luputan kokomoi kinatagakan dii 14 tuhunkampung, om pulis pinoposodia kotoinaan Mogium om Manampasi (SAR) dosido.
“Ontok tadau koiso do mogium, minomolisa zikoi do lahan ginuno do munggui do suminuang do kokozuvan.
“Mantad voou do mogium nokokito zikoi do palasitik montok takanon, paket sogilit aiso suang om tampat koubasan dioho do mundoong. Pogiuman SAR nokotood doid 5 minsosodop sabap otuvong.
“Asanang ginavo dagai do toinsanan munggui nga nokito aiso ingkukuo ontok tadau koduvo pogiuman do tinoina SAR sundung potuu kogumuan dioho nga nouzan,” ka disido.
A. Sahak minoboos kotoinaan SAR pinapaamung do pulis, pakakalaja kokozuvan, Upis Taoui om Manampasi, tuhun kampung om puu paganakan do munggui.