Nulud di Tatakbarambang
Boros o pogintutunan do tikid tinaru id pomogunan diti, okon ko pogun niyonon toi ko wotik do garung. Tulun Kadazandusun (KD) au kabagal nung mangagil (to be proud of) noopo do garung, dapu om toilalaan suminding.
Ogilon do tulun KD i iso kosolod nopo nga toilalaan moboros boros tina (mother tongue). Isai tulun suai milo mongindaraat do boros KD? Boros nopo nga pinatahak do Kinorohingan om orohian o Kinorohingan tulun KD momoguno boros KD do pasasad om potonu (preach) Boros Kinorohingan tumimpuun mantad pialatan tulun KD sondiri pogului kumaa tinaru suai. Boros tinaru KD minog do atampasi.
Kotomposian do boros tinaru popomiloh tulun KD minsingilo boros suwai lolobi po om boros pomogunan (world language) iri no boros English. Aiso koiriiraan (loss) do tulun KD nung koilo boros tinaru suai miagal ko boros English om BM om atampasi po kawagu boros tina sondiri (BKD). Tulun Sina om India apatut usuyanan do tulun KD. Tulun dilo moboros boros tinaru siolo id walai om hinonggo nopo yolo tumimung om mogiruruba.
Boros diolo potudukon id sikulan. Boros KD mulong po potudukon id sikulan do maso baino, nga iso kobungahan tagayo nopo nga au arahi kogumuan molohing tangaanak KD sondiri do minsingilo tanak duiolo do BKD id sikulan porinta. Tulun KD no o atandasan momunso boros sondiri tu au mimboboros boros sondiri. Sumusuhut diti nopo nga pinibarasan di Serena om i Joe (sangaran au otootopot om iti pinibarasan nga au nogi otootopot nga sinupu noopo do monunurat moi do kootus o boroson maya boros tina sondiri, om nung nakasangai ngaran nu, siou tu au tinomod). Kopisanangan do mambasa. Joe: Basug tokou nung mangada boros tinaru sondiri. Serena: Ika nogi nga basug tu au koilo moboros. Joe: Kada oku tandasai songulun oku. Serena: Isai tandasan ku? Joe: Molohing ku Serena: Nokuro manaku yolo? Joe: Tapa ku pakaraja id upis porinta. Sundung do koilo moboros boros tinaru, au isio oinsan moboros kumaa dogo om okuudi timpu poingamung dagai id walai. Serena: Poingkuro i tina nu? Joe: Au pakaraja tina ku nga okon ko mantad tinaru KD isido. Au isido koilo moboros boros tinatokou mantad timpuuni. Serena: Koimamang ko no miagal dino. Joe: Mada oku do yoku om molohing ku no o tandasan nu. Ogumu po paganakan tulun nokoimamang KD miagal dagai.
Serena: Au oku ihmonondos dika om molohing nu toi ko isai nopo tulun KD nga obungahan oku nokuro ma tulun tokou au kopuriman koponsolon atampasi boros tina sondiri.
Joe: Okon ko asanang bo do manampasi boros tina tokou timpu baino tu poinlongot tokou tulun togumu mantad tinaru suai i moboros do boros Malaya.
Serena: Nung haro daa piipiro tulun tokou koiyon potimporon id pogun labus miagal ko id Australia, koimagon daa iti tinaru tokou om atampasi boros tina tokou hilo. Sumakag yolo om minggumu. Gunoon diolo boros tina do rumayou Gampamasi miampai abaal nogi toilalaan diolo mimboboros, mokinongou, mambasa om monurat id boros English.
Joe: Osonong kopio ino pomusarahan nu. Uhupan kito no daa do Kinorohingan do popootus dino pokimamaan nu. Serena: Kaakun oku dika. Wanadan ko no do Kinorohingan. Joe: Pounsikou sokodung nu. Ika nga wanadan nogi do Kinorohingan.