Alansan kopio onuan ponimbangan atag 20 calon Koonduan BN tumanding id PRU-14
KOTA KINABALU: Kopomuruanan Barisan Nasional (BN) pogun om Longkod kangaam kopio manahak ponimbangan tototopot kokomoi do atag kiikira 20 calon Koonduan BN Sabah ih posuulon montok tumanding id Pomilian tagayo Ginumuan ko-14 (PRU-14).
Panakadai Montiri Kotundaan Kotos om Koburuon Teknologi Kopoilaan Datuk Hamisa Samat (gambar) minoboros do ahal dilo apatut onuan ponimbangan tototopot sabap do ngaran Koonduan BN pogun ih pinosuul dilo tantu noh do kaampai mantad calon haro kobulihan, obuli kamanang om haro koimbayatan di tagaras.
Tumanud disio kinoponguludan ngaran calon koonduan dilo nogi ponokotanda do kopomuruanan poingkakawas pogun pinoposiliu do tonggungan tinimungan dilo montok songowian ngawi mamung id pamansaian ralan tonudon om kapatantuan.
“Au kaanu mogolim do solinaid diti, Koonduan BN toririmo mindahu gana montok monulung mintamong kotundunan rayat om mongilo diolo miampai lobi tosomok. Mantad dilo, pomilian koonduan sabaagi Puru Parlimen toiko Adun ontok PRU-14 nopo nga koontok kopio.
“Kosokodung kopio oku do kopoilaan di Ponorikohon Koonduan BN Sabah Datuk Armani Mahiruddin om alansan kopio do momuruan poingkakawas id bogian pogun om Longkod kapaganu ponimbangan tototopot kokomoi do ahal diti,” ka disio id iso kopoilaan koniab.
Di kawawagu, noboros di Armani do nakaatod noh disio o nuludan ngaran 20 calon Koonduan BN kaampai mantad wuor laid om wagu montok tumanding id PRU-14 kuminaa Ponorikohon Koonduan BN Tan Sri Shahrizat Abdul Jalil.
Toinsanan calon dilo haro koimbayatan di tagaras om otumbayaan isio do kobulihan diolo montok onuan ponimbangan sabaagi calon mantad momuruan poingkakawas.
Minoboros Hamisa do atag 20 ngaran sabaagi calon Koonduan BN pogun dilo nogi ponokotanda do Sabah haro momuruan tondu di haro kobulihan montok pointangaon.