Pom waig nosonsong togis, kiburutak
# Ribuan momoguno nokotoguang aiso waig tolidang mantad podi tadau Minggu nakatalib
RANAU: Ribuan mogigion mantad ratusan kampung id watas diti, baino nokotoguang ahal aiso waig nusapan mantad podi tadau Minggu sumusuhut duo pom waig ih pinoiyon id ‘Water Intake Lipasu’ sanganu Koupisan Waig Bogian Ranau (JABR) nosonsong nountunan togis om rana/burutak sabap liud kiburutak mantad podi tadau Koonom.
Pinongintongan id tampat Water Intake Lipasu koniab nokoilo do goduo-duo pom dilo nosonsong noh om momoguno do laang tosisikap montok monginsonong kawagu miampai momoguno injin.
Injinior JABR Mohd Kharul Faizie ontok romuto minomisunud do bogian koupisan baino diti minggisom mongukab kinountunan togis id pom nosonsong dilo om kalapas dilo monginsonong kawagu kounalan dilo montok kapasanangan do momoguno ngawi.
“Poingkuro poh nga, karaja mongukab togis id pom dilo nopo nga tumanud doid kooyuon tawan,” ka dau mikuo mokiampun kumaa momoguno ngawi sabap koinsanai kosusaan di nokoimbulai.
Namot dilo, songulun mantad puru komiti Umno Bogian Ranau Dato’ Haji Saprin Karim ih minoi nogi intong sondiri koiyonon pom nonsonsong dilo, mangatag kumaa porinta tuh maganu pongintongan tototopot kokomoi do kobolingkangan nakasou kapanaakan waig nusapan kumaa mogigion id Ranau, ih asasaru antakan mantad podi guminuyu tana ontok 5 Jun 2015.
“Mangatag oku mooi do porinta momonsoi iso tangki tagayo siriba tana montok monimung toiko montok poopian waig tolidang montok poluyungon tosisikap kumaa momoguno ngawi soira antakan lumiud id Bawang Liwagu, Bawang Bambangan om Bawang Mesilou A om B.
“Pamansaian tangki siriba tana au koponolon balanja di ogumu kopio piagalon atag papawaliu do tiyonon ponimungan waig JABR pakaayan id Bawang Mokodou, Bawang Nokemura toiko Bawang Koninipir ih koponolon balanja lobi RM200 riong suai ko momoguno timpu di alaid montok papanau dilo.
“Onu ih kiguno baino diti nga montok manalasai do kobolingkangan aiso kapanaakan waig nusapan idsuang timpu di talaid,” ka dau.