Kapasagaan momonsoi kawagu lamin notutudan, tumanud kapatantuan koporintaan pogun
TAWAU: Kapasagaan momonsoi kawagu lamin id tapak kinotutudan ontok 1 Julai nakatalib id Kg Hidayat Laut, Batu 4 Ralan Apas, hiti tumanud doid kapatantuan do Koporintaan Pogun.
Porosiden Konsol Kakadaian Tawau ih nogi Ponorikohon Komiti Kaantakan Taraat Kinoiyonon Watas (JKBA) Tawau Alijus Sipil minoboros do ahal dilo maganu kokiraan kapatantuan (polisi) porinta.
““Laang porinta tokou nopo nga montok mongingkudi do ginumu pamansaian lamin id kopongiyanan sawat waig id pogun diti,” ka dau id pitimbungakan abar hiti, koniab.
Minoboros isio do korikohonon tana kilinaab 41 ekar id Batu 4 Ralan Apas nopo nga montok pongiyanan panangkusan Filipina id siriba pongintongan Tinan Koumoligan Pogun Sabah.
Mantad ginumu dilo, kiginumu kiikira 6.5 ekar ih noilaan sabaagi bogian nokoompit id suang kinantakan kinotutudan dilo, ih piaga-aga do kopoompit do 253 lamin.
“Sabaagi momuruan, (Puru Lamin Koundangan Pogun Balung Datuk Datuk Syed Abas Syed Ali) obuli mokianu kasagaan momonsoi lamin kawagu mantad Koporintaan Pogun.
“Nung haro kasagaan mantad Koporintaan Pogun, lamin ngawi ih wonsoyon kawagu do hilo minog do wonsoyon miampai ongosodu om okon ko ongosomok kopio,” ka dau.
Tumanud dau ‘statistik’ nokopokito do soosomok 30 paratus munggui kinotutudan id pinongiyanan dilo nopo nga okon tulun mamasok nga kaampai mantad poingigit IMM13 om pasport.
Kalapas sinoriuk nogi, noilaan do aiso tiiso mantad 253 lamin ih nokoompit id kinotutudan dilo nokorijisto miampai Sabah Electricity Sdn Bhd (SESB).
“Rati diti nopo nga toinsanan kapanahakan winakas lotiri ih notorimo mantad lamin ngawi id tapak kinotutudan solinaid diti nokoompit id pinongoputan tolosok,” ka dau.
Om nogi, noboros disio do kapanahakan waig totopot ih pinoluyung mantad Koupisan Waig Sabah nga kininaru kiikira 30 meter kumaa id lamin ngawi nongotutudan, lobi dilo kagu au noilaan.
Pinogitoban kinopor-ijistaran munggui kinotutudan nokopokito do kiginumu 1,141 tulun mamasok (170 Boyoon Suang LaminKIR) om 819 okon tulun mamasok (91 KIR) pinorikud miampai koinsasanai diolo kopoompit do kiginumu 1,960 munggui om 253 KIR.
Utusan Borneo pinoilo do kinotutudan tagayo ontok 1 Julai nakatalib id Kg Hidayat Laut dilo natadon mantad pinongoputan wayar sabap kapanahakan winakas lotirik di ‘nokolobi winagat’.