Papapanau motosikal noduso, savo nosinduahan
LAHAD DATU: Songuhun papapanau noduso om savo dau au osongkuo nosinduahan kahapas motosikal kavo Yamaha Lagenda ih sinakazon nokoompit id kohigaganan talun alun kopoompit do iso padsakazan 4WD kavo Toyota Vigo, id Lahan Lahad Datu-Sandakan, ontok sosodopon tadau Koiso nakatahib.
Id kinantakan kiikila jam 6.20 sosodopon dino, munggui nointutunan sabaagi Maslan Kumin, 34, minidu pogun id Hospital Lahad Datu kahapas soosomok 12 jam monokisaap niawa, sabap noindamaan nosinduahan id boogizan tuhu.
Om savo munggui (tuminaap) kiumul 25 toun nosinduahan tokuudi noopo id boogizan takod om hongon om pokiusapan sabaagi sumakit habus.
Huguan Pulis Uvang Lahad Datu ACP Hamzah Ahmad minoboos do ontok kinantakan, goduvo-duvo munggui masaon id pindahanan mantad Sandakan pougadan doid Kakadazan.
“Pinonoizukan timpuuni id tampat kinantakan, noihaan tokou do kinohigaganan kikotumbazaan natadon mantad papapanau id nombo songian nopo nokoikot id tampat kinantakan nakalanggal boogizan tisan ponong gibang Toyota Vigo dino nokomoi ih kumiong doid vanan montok pougadan doid Lahan Segama.
“Ontok timpu kinantakan, noihaan koozuvon sumbu kootulan lahan padsakazan 4WD nopo nga otomou om sumbu kootulan id koozuvon avasi.
“Asil kinantakan dino, goduvo-duvo munggui pinoboos do nakagavad doid savat lahan. Munggui miampai sinavaan dau kahapas dino pinosikap pinaatod doid Hospital Lahad Datu montok pokiubatan potihombus. Munggui ih noindamaan nosinduahan ingkuo po nga pinoluput do minidu pogun kiikila jam 6 kosuvabon di tadau Koduvo,” ka disido.
Tumanud Hamzah, kes soizukon tumanud Seksyen 41 (1) Akta Padsakazan Lahan 1987 om ponoizukan potihombus kakaal papanaon di Upisol Monoizuk Trafik BSPT Insp Mohamad Kemil Rahmat.