Kinahantazan 36 minghuda JPSM kapanaak sunduvan vinakas kalaja tabaa
PAPAR: Kinahantazan ‘graduan’ ngavi Institut Pinghudaan Teknik om Padagangan (ILTP) tuminanud do abaabazan ‘teknikal’ om padagangan kikotumbazaan do kaanu manaak sunduvan doid vinakas kalaja tabaa id kaganaan kalaja ngavi id Sabah.
Panakadai Montili Kotundaan Kotos om Kobuu’on Teknologi Kopoihaan Datuk Hamisa Samat minoboos do boogizan dino okito tumanud do ‘standard’ pinonudukan di pinouhan do ILTP kumaa susumikul ngavi om nogi papakavasa dioho kamampu monokiahit om poinsodia sumuvang kaganaan kalaja kinoizonon om habus pogun.
“Miampai koingkavasan kotundaan pogun, kikahansanan zou tu saavi-avi ‘graduan’ kaanu sumuvang kaganaan kalaja miampai hobi asanang miampai kivaa no di sitifikit om kinookunan kabaahan di naanu id ILTP,” ka disido ontok pinotimpuun do Abaabazan Konvokesyen JPSM Gontob 1 toun 2017, koniab.
Naazou nogi disido o haang Koupisan Kotundaan Kotos Tuhun (JPSM) pogun di nokitonan nakaanu minomo’uang kogumuo vinakas kalaja kikabaahan om nohuda id kaganaan kalaja kinoizonon.
“Haang diti ahansan do kaanu popoingkavas ontok timpu tabantahan montok humusi kopokionuon polinta tu kamampu tokou poposodia do tuhun kiguno di kouha om kivaa kikabaahan takavas om avasi.
“Otumbayaan zou do abaabazan diti obuli sumuvang dagang kalaja kinoiyonon hoohobi kikoompitan kaganaan momodokot di koubasanan miampai kotundaan pomounan tumau om gas.
“Miampai kinoingkavasan kotundaan pogun, manaak zou kahansanan tu saavi-avi ‘graduan’ kaanu sumuvang dagang kalaja miampai hobi asanang, miampai kivaa nodi sitifikit om pinoimaganan kabaahan di naanu mantad ILTP,” ka disido.
Kikahansanan zi Hamisa do JPSM tumihombus popoinggumu do abaabazan kabaahan ih posodiaon montok manaak hobi pihion doid komuhakan ngavi.
Tumanud disido, boogizan tumau om gas pinoluput do momoguno do ginumu vinakas kalaja di togumu om idsuang ahal diti, obuli ILTP momusoou om monoizuk mahik pisokodungan dioho miampai Institut Teknologi Petroleum (INSTEP), Petronas montok poposodia do abaabazan vagu ih koubasanan miamapi kogunoon pomounan tumau om gas.
“JPSM nogi mositi koiho om kikoinsamadan nokomoi kogunoon pinghudaan om koingkokoton insan timpu pomounan pogun montok kotihombus ‘relevan’ sabaagi koupisan kotundaan tuhun kiguno id Sabah om kamampu poposoibau do vinakas kalaja ih koponokiahit id dagang kalaja pogun,” ka disido.
Id abaabazan dino, soginumu tohu tuhun minghuda nokotoimo kazaan Sitifikit Minghuda Poinvavasi Gontob 1/2017, izioho nopo dino nga ih Leylven Voo (Tabaa Momogino), Widiawati Watis (Monombuku Tobuk) om Eljackley Enson (Teknologi Kimpalan 6G).
Soginumu 36 minghuda ILTP JPSM naakaanu minomupus do pinghudaan montok abaabazan ‘teknikal’ om padagangan id boogizan ‘Program Teknologi Kimpalan’ (6G) om ‘Program Jurukecantikan’ om ‘Dandanan Rambut’.
Nokotindapou nogi ih Kumoduvo Potunud JPSM Aziz Salim, hansanon INSTEP, Petronas, mohoing om minghuda ngavi.