Tolu tulun nataan, monulung ponoriukan kes minamatai
KOTA KINABALU: Pulis minanaan tolu tulun kaamung duo tulun tondu montok monulung ponoriukan kokomoi kinokitonan tinan tondu id iso kinoligaganan di kinomi sabaagi kes mamatai.
Munggui nointutunan sabaagi Lisabilah Dulimah, 28 natadon mantad Kampung Tambalugu Tuaran nokito minidu pogun id iso kinoligaganan id Ralan Bypass mitoguang Sikul Agama Silam di tadau Kaapat nakatalib.
Boyoon Pulis Watas Kota Kinabalu Asisten Komisioner M Chandra minoboros do kotolu-tolu ‘suspek’ ih nataan kikotumbayaan do nokoompit idsuang natadon kinapataion munggui ih nogi tambalut ‘suspek’ do naamot diolo id pindalanan muli suminakai korita kawo Perodua Kelisa id jam 5.30 minsusuvab.
“Kinantakan timpuuni nokoilo do munggui om apat tambalut disio miniodu id suang korita pogului nantakan o kinoligaganan ih natadon munggui minidu pogun id tampat kinantakan.
“Papapanau korita pinoruput do nosindualan id longon om masaon pokiubatan id lamin pongusapan, om tambalut munggui suai aiso nunuunu nosindualan,” ka dau.
Minoboros Chandra do bogian pulis kalapas dilo minanaan om minongoriman duo tondu om songulun kusai montok monulung ponoriukan gisom 14 Julai.
Isio poingkuro poh nga minoboros do bogian dau kakaal papanau do ponoriukan miampai maganu kokiraan toinsanan di nantakan doti om mokianu nonggo-nonggo saksi kinantakan tuh rumikot rumomut pulis montok manahak kopoilaan.
Kawagu dau, nogi nogi disio kinantakan nopo nga kes mamagamu miirad ih pinaralad om pokionuon do bogian dau o tulun togumu montok au momonsoi nunu noopo ‘spekulasi’ di obuli kapangasou do ponoriukan.
Tumanud dau ‘motif’ kinantakan kakaal id ponoriukan om kes diti soriukon tumanud Seksyen 302 Kanun Koinggoritan.