Duo susumikul tinaan pulis dinawa minanambarana tambalut iso kalas

KINABATANGAN: Duo susumikul ih posodia tumoguang do poporiksaan Sijil Balajaran Malaysia (SPM) tinaan pulis tinandasan minanambarana tambalut iso kalas diolo miampai pinisowolianan ontok 1 April nakatalib.

Boyoon Pulis Watas, Superintenden A.Sahak Rahmat minoboros do goduoduo ‘suspek’ nopo nga susumikul Tingkatan Lima id iso sikulan id watas diti tinaan pulis kiikira jam 5 sosodopon ontok tadau Kaapat.

“Suspek tinaan sumusuhut ruputan pulis winonsoi munggui ontok tadau ih iso’i id jam 12.34 tangadau kalaaps gambar kinantakan dilo ih ginambar di songulun mantad ‘suspek’ nakarayat om noilaan do bogian ponorinaan sikul,” ka dau.

Minoboros isio do kinantakan dilo tinandasan nantakan soira goduoduo ‘suspek’ diti minonombirang munggui (tambalut iso kalas) pogului minanambarana dau miampai pinisowolianan kiikira jam 9 kosuabon id iso sulap id tohuri sikul.

“Asil pinonoriukan nokoilo do ontok kinantakan, munggui songowian duo ‘suspek’ kiharo id sikul montok projek momorisi kalas pogului tinombirangan isio gisom sinambarana,” ka dau.

Minoboros A. Sahak do soira nokorikot id tampat kinantakan munggui sinansagan suminuang id suang sulap dilo di goduo-duo ‘suspek’ miamapi minamagayat longon munggui.

“Kalapas munggui nokosuang idsuang sulap dilo, kinunsian di ‘suspek’ o longobon om minanahak kopoingatan kumaa disio mooi do au poposunud do ahal dilo kuma isai noopo kaamung mongingia sikul,” ka dau.

Noboros disio do kalapas dilo sinansagan pinapaharo do ‘seks’ miampai goduo-duo ‘suspek’ miampai aiso kasagaan munggui sondiri.

Noboros di A. Sahak do sinansagan munggui pinopolisok do ahal dilo solinaid diti sabap tumongob kokomoi koumoligan tinan dau kalapas nokotorimo pongundoronokan mantad ‘suspek’ ih noriman gisom 13 Julai tabantalan montok monulung ponoriukan id suriba Seksyen 376 Kanun Koinggoritan ih kopongobi do ukuman jiil au kolobi 30 toun nung katantu do kasalaan.

Kawagu dau, koilaai nopo porobuatan goduo-duo ‘suspek’ dilo ontok tadau Kotolu nakatalib kalapas gambar kokomoi do kinantakan dilo nakarayat maya kogunoon ‘Whatsapp’ nokomoi do susumikul pogului noilaan di bogian sikul.

“Kalapas noilaan ahal dilo id bogian sikul, munggui om goduo-duo ‘suspek’ linohou di mongingia ‘disiplin’ sikul montok laang potilombus.

“Munggui kalapas dilo pinoporuput doid bogian pulis om nowit noh doid Hospital Kinabatangan montok pomorisaan pogului pootodon doid Hospital Duchess Of Kent, Sandakan montok pomorisaan potilombus,” ka disio.