Lotilik Tohosok: SESB mositi apantod id boogizan hamin ‘setinggan’

TAWAU: Sabah Electricity Sdn Bhd (SESB) mositi maganu haang tapantod montok monguhan kapaagatan manakau kapanaakan lotilik id boogizan pomuhaminan aiso kasagaan (setinggan) id pogun diti, ka di Panakadai Montili Kotundaan Kotos om Kobuu’on Teknologi Kopoihaan, Datuk Hamisa Samat.

Minoboos isido, kopongoputan lotilik miampai aiso kasagaan momoguno do mogisusuvai haang adadi kontodonon doid kotutudan tagazo di antakan ontok tikid toun id pogun diti miampai kes kavavagu kopoompit do 261 hamin id Kampung Hidayat, Batu 4, Lahan Apas doos doiti di tadau Koonom.

“Kinantakan diti apatut do kosukup montok manaak pangajalan kumaa toinsanan boogizan om boogizan SESB mositi manamong kapaagatan manakau kapanaakan lotilik ih samakin tumongkop,” ka disido.

Hamisa ih nogi Puu Hamin Koundangan Pogun (ADUN) Tanjong Batu, minoboos doid monunuat abal kahapas pinapataak do tohuod vagas id hongkod papanau kalaja manaak sakadai montok munggui kinotutudan Kampung Hidayat, Batu 4, Lahan Apas doiti di songkoniab.

Id ahal dino, minanaap nogi kogiiginovoo aiso tonggungan vookon mogiigizon kampung ih manakau kapanaakan lotilik gisom kopoimbuhai do kosusaan kumaa momomoguno lotilik nokolijisto ih suvai.

“Ihoo no kokomoi kohigaganan monoodo kopongoputan lotilik tohosok gisom kapanaak kobohingkaangan om kavagatan kumaa tuhun suvai, ada mokimamaa tinan sondii om dumadi tuhun kitonggungan,” ka disido.

Id ahal dino, nuhit nogi di Hamisa atag tu potitikid hamin poposodia do iso kakamot pomisok tapui om sokio do antakan kotutudan kakaal obuli tamangan miampai tosisikap.

“Nung obuli tokou momohi balang suvai, nokuo kakamot pomisok tapui au tokou kamampu momohi, nga otopot nopo kakamot dino (kakamot pomisok tapui) pokigunoon montok koumohigan hamin,” ka disido.

Id kinantakan tadau Koonom nakatahib, soginumu 261 hamin savat vaig nopunso kinontodonon do 1,960 tuhun ih poimpakai po noohu.