Kapanaakan vaig id Sandakan hobi mantad kosukup: Pairin
SANDAKAN: Pangahabusan kapanaakan vaig soginumu 156 MLD (lizong liter sangadau) kogunoon montok momomoguno id uvang diti nopo nga hobi mantad kosukup.
Kumoduvo Vozoon Montili Sabah Tan Sri Joseph Pairin Kitingan minoboos do loji pongusapan vaig id uvang diti, iho nopo nga Loji Pongusapan Vaig Segaliud papahabus do vaig soginumu 82 MLD, Loji Pongusapan Vaig Kinabatangan (58 MLD), Loji Pongusapan Vaig Sibuga (sizam MLD) om Loji Pongusapan Vaig Hiltop (tuu MLD).
Noboos nogi disido do kivaa katabazan hobi 57 MLD kapanaakan vaig pohobusan mantad apat loji tagazo id uvang diti.
“Koinsasanai kapanaakan vaig id uvang diti nopo nga hobi mantad kosukup,” ka disido ontok kosoomo do monunuat abal kahapas minokinongou bobooson kopopintahangan mantad Koupisan Kapanaakan Vaig Sabah Uvang Sandakan doiti, di tadau Kohimo nakatahib.
Iho kopinamot kotumbuhuzan kalaja duvo tadau disido doid uvang diti mantad podi songkosodop.
Pairin ih nogi Montili Kotundaan Infrastruktur Sabah minoboos do pongintongan tototopot kapanaakan vaig id uvang diti nopo nga monguhan sogu kovosuon kopohuzungan paip om kapanaakan vaig au koikot sundung pia kivaa no boogizan kivaa no kounahan vaig paip.
Ka disido polinta maganu pongintongan kobohingkaangan dino montok uhanon montok manaak kapasanangan kumaa layat montok kapaganu do kapanaakan vaig nusapan.
Tumanud disido nung kiguno koinsomokan di naanu poguhui diti sabaagi haang montok monguhan kobohingkaangan dino soizukon mahik tu kapaganu haang ontok timpu tabantahan di hobi kiasil.