Balajalan paapuvan timpu tanau’

# Polinta minggisom popoingkavas gontob kalaalahanon balajalan

TAWAU: Polinta manaak pongintongan poimponu montok popobuu do kotundaan om popoingkavas do kalaalahanon balajalan id pogun diti.

Panakadai Montili Kotundaan Kotos om Kobuu’on Teknologi Kopoihaan, Datuk Hamisa Samat minoboos do balajalan nopo nga iso paapuvan timpu tanau’ di kiguno montok pogun.

Ka disido, ingkuo po nga montok poposodia do kotoinaan balajalan kumaa layat, iho okon noopo pouhanon do boogizan polinta saba-baa nga mositi nogi pouhanon di mohoing potitikid susumikul.

Ka disido, mohoing au apatut do papasaan tonggungan momo’ia tanak ngavi doid ongingia’ngavi id sikul noopo.

Pinatahang disido, mohoing mositi koompit nogi om ahal balajalan, hoohobi manaak balajalan id daamin.

“Kahantazan tanak ngavi humansan doid kalaja ‘kolaboratif’ piahatan boogizan sikul om mohoing dino sondii,” ka disido.

Noboos disido ahal dino id Abaabazan Ounsikou Aidilfitri om kapanaakan Sakadai Kousinan Timpuunon Koposikulan 1Malaysia soginumu RM100 kumaa 37 susumikul id Dewan Sikul Kabansaan (SK) Perdana, di tadau Koonom.

Sakadai kousinan timpuunon nopo ponoimo sakadai koduvo.

Nokotindapou nogi id abaabazan dino nga Upisol Balajalan Uvang Tawau Darman Shah Asakil, Mohoingon Sikul SK Perdana Tawau Mohd Ekbal Khalid, Ponulung Vanan Jaafar Daud, Ponulung Vanan Ahal Susumikul Ruslee Ahmad, pakaakalaja Unit PPM Tanjong Batu, mohoing ngavi om susumikul ngavi sikul dino.

Hamisa ih nogi Puu Hamin Koundangan Pogun (ADUN) Tanjong Batu pinoposoou nogi doid mohoing tu kopomoguno usin sakadai koposikulan miampai tavaavasi miampai popoguhu do balanja ngavi montok balajalan tanak ngavi om au kahasa momoguno sakadai dino.

“Mohoing mositi posodia minggisom manaak kotoinaan tavasi kozo om mamung poimponu id kaganaan balajalan tanak montok papatantu do kaangazan tavasi balajalan tanak ngavi dosido. Mimang koiho tokou do mohoing mositi mananggung balanja ngavi ih samakin mingkavas, sakadai miaga diti nopo nga haang tavasi polinta montok papagaan do kavagatan dosido.

“Sakadai dino mositi do gunoon miampai tavaavasi montok potitikid kogunoon tanak ngavi kaamung gaung sikul tu susumikul ngavi kaanu momiumo koozuvon pambalajalan di tavasi,” ka disido.

Id abaabazan dino nogi kivaa o pokitonan sazau, humozou om silap mato.

Vookon susumikul SK Perdana Tawau id abaabazan dii.

Hamisa papataak do Sakadai Kousinan Kotimpuunon Koposikulan 1Malaysia kuminaa 37 susumikul id Dewan SK Perdana, Tawau. Gambal vanan, songuhun mantad susumikul ii nokotoimo sakadai kousinan.