IPD Sandakan minanahan onom kusai, minanalasai siam ‘kes jenayah’
SANDAKAN: Longkod Upis Pulis Watas (IPD) Sandakan nakaanu minamagakom tulun om tinimungan di nokoompit id suang mogisusuai kaparagatan mamabak lamin, manakau harata om koimaan taraat mongorumpak maya ‘Ops Momunso Koimaan Taraat’ poompus karamaian Aidilfitri di nakatalib.
Boyoon Pulis Watas Asisten Komisioner Mohd Azhar Hamin minoboros do kiginumu onom kusai ih kaampai mantad rayat kinoiyonon om tulun songkosuaian kiumur bindurugan 21 gisom 36 toun tinahan nokoompit idsuang kes dilo.
“Miampai kinalantaian kinagakaman dilo, bogian Koupisan Ponoriukan Jenayah (JSJ) IPD Sandakan nakaanu minanalasai siam kes, minamagahau mogisusuai barangan ilo nopo nga kiginumu 32 barangan om iso korita ih gunoon montok kaparagatan koimaan taraat dilo,” ka dau hiti koniab.
Minoboros Azhar do asil pinomorisaan kuminaa toinsanan diolo ‘positif’ minomoguno dadah kawo methamphetamine (syabu).
Ka dau kinalantaian kinagakaman dilo nopo nga asil pinisokodungan miampai tulun ginumuan miampai minanahak kopoilaan kumaa bogian pulis gisom kinagakaman ‘suspek’ di nokoompit.
Idsuang kes koiso, duo ‘suspek’ rayat kinoiyonon kiumur bindurugan 21 gisom 31 toun nagakom kikotumbayaan do minanakau harata kakamot id Taman Sejati Batu 7 hiti.
Pialatan di nahau mantad goduo-duo ‘suspek’ dilo nga duo beg galas, apat pasang kasut mogisusuai jenama, solipar jenama Adidas, playar, pomusing skru, spanar, tung gas, bateri jenama GS Plus One, kantung sandangon, rantai liou amas, dompet, kad ATM, tusin karatas 1 Dollar Brunei Darussalam om iso korita Perodua Kancil miampai tanak kunsi korita.
Tumanud Azhar, modus operandi idsuang kes dilo kikotumbayaan do papanau kaparagatan manakau miampai momoguno do padsakaian di nahau miampai manahak pongintongan do barangan id labus lamin.
Idsuang kes koduo, duo kusai kiumur 30 om 36 toun, iyolo nopo nga tulun kinoiyonon om tulun songkosuaian ginakom sabap pinapaharo do mamabak lamin om minanakau id Taman Crysthemum Batu 1 1/2 om Hospital Sandakan.
Barang ngawi di nahau nopo nga dompet, MyKad, MyKid, lesen papanau, kad debit, tolu kad bank om Mastercard.
‘Modus operandi’ ih ginuno idsuang kes dilo nga papanau do koimaan taraat mamabak lamin miampai poingkuro sumuang do id suang premis porinta, ilo nopo nga lamin pongusapan om papanau do koimaan taraat manakau harata kakamot do naamot pinoporuput alawong popoopi do barang kigatang idsuang korita.
Kinagakaman kotolu nopo nga kopoompit do songulun kusai rayat kinoiyonon