Apat noduso, koligaganan kororosi van nokopilanggar miampai lori tangki
LAHAD DATU: Apat kaamung duo tulun tondu noduso kalaaps van ih sinakaian koinsanai munggui nokoompit id koligaganan kororosi kopio kopoompit do iso lori tanker id Kilometer 3, Ralan Lahad Datu-Tungku, di kosuabon tadau Koiso.
Id kinantakan kiikira jam 6 kosuabon dilo, koinsanai munggui ih minidu pogun id tampat kinantakan nointutunan sabaagi Eddie Luna, 46 (papapanau van) om tolu susumakai, iyolo nopo nga ih Mohamad Jujani, 67, Hanisah Baskua,37, om Kabdatul Alinjaman, 34.
Boyoon Pulis Watas Lahad Datu ACP Hamzah Ahmad minoboros do kinoligaganan kororosi dilo kikotumbayaan do nantakan soira van ih sinakaian kaapat-apat munggui dilo pinoboros do nokopilanggar miampai lori dilo ih rumikot mantad ralan pitukaan (Lahad Datu pakaayan id Tungku) om katangkid id sasahanan ralan wanan pogului nootungan di padsakaian awagat dilo.
“Asil mantad kinantakan dilo, koinsanai munggui ih kiharo idsuang van minidu pogun id tampat kinantakan,” ka dau mikuo minanamba do papapanau lori kiumur 58 toun aiso nunuunu nosindualan om baino tinaan montok ponoriukan potilombus.
Tumanud disio, tinan toinsanan munggui pinaatod doid Hospital Lahad Datu om kes soriukon tumanud Seksyen 41 (1) Akta Padsakaian Ralan 1987.
Naamot dilo, Boyoon Balai Bomba om Mongumolig Watas Lahad Datu Mohamad Apandi Mahmood minoboros do nokotorimo o bogian dau do pamalahauan kaagaban kokomoi do kinantakan dilo id jam 5.59 kosuabon.
Ka dau kiginumu duo injin, duo padsakaian ‘utiliti’ om iso ambulans MERS songowian 18 puru linuguanan disio sondiri minoi id tampat kinantakan montok monulung papalabus munggui di nagansip.
Sinansagan nogi di bogian diolo minokianu ponulungan tolu tinan kren misosondiri montok monulung papawaliu lori dilo pogului mininggisom pinapalabus koinsanai munggui di nagansip idsuang korita.
“Munggui koiso nakaanu pinapalbus id jam 9.05 kosuabon sinusuut tolu ih suai om pinapanau karaja nopupusan id jam 9.45 kosuabon,” ka dau.