200 nokotindapou abaabayan manahak kopointalangan kokomoi pongidopan kampung om asil kakamot kapalabusan ponombuluian
KENINGAU: Kiginumu 200 tulun nokotindapou abaabayan manahak boboroson kopointalangan kokomoi do abaabayan pongidopan kampung om asil kakamot kapalabusan ponombuluian bogian watas ih pinaharo id lilintuhunon tulun togumu hiti di tadau Koonom.
Manahak boboroson kopointalangan pinanjur do Upis Watas miampai pinitambaan do Komontirian Ponombuluian, Koubasanan om Kinoiyonon Posorili, Kotinanan Ponombuluian Sabah om Komontirian Ponombuluian om Koubasanan Malaysia dilo pinotimpuun di Puru Komiti Umno Keningau Yazid Mohd Hasnan Tawfik.
Abaabayan dilo pinaharo sabaagi koposodiaan tosikap watas diti montok mamaramit do Toun Kumakap Keningau 2018 hinonggo kogumuan nokotindapou ngawi nopo nga mongindapu do pongidopan kampung, kulam sada om asil kakamot kapalabusan ponombuluian suai.
Id pason dau, noboros di Yazid do abaabayan dilo koontok kopio montok manahak kosiwatan tosikap kumaa mongindapu monginodop kampung om asil kakamot kapalabusan ponombuluian montok momonsoi do koposodiaan tosikap mamaramit do Toun Kumakap Keningau ontok toun tabantalan.
Ka dau, osonong kopio watas Keningau osiliu pomorunan ponombuluian sabap ilo nopo nga watas di tosonong kopio montok wayaan kumaa id watas suai id pogun diti maya kounalan talun alun Kimanis-Kota Kinabalu, Keningau-Tambunan-RanauSandakan, Keningau-Kalabakan-TawauLahad Datu, Keningau-Tenom-Sipitang om piipiro ralan suai.
“Idsuang ahal dilo, pokionuon o mongindapu ponombuluian id watas diti tuh kaanu mamagahau kosiwatan di pinosodia porinta doulu noh id suang bogian diti hinonggo pomorunan ponombuluian nopo nga iso mantad popoingkawas konuonuan kousinan watas diti.
“Ontok timpu ih iso’i, rayat mositi manahak sokodung kumaa abaabayan ngawi di obuli monulung diolo popoingkawas do kosinan,” ka dau.
Minoboros ih Yazid do mantad podi id suribaa ponorinaan koporintaan Barisan Nasional (BN), watas diti nokotoguang ponimbanan di agayo kopio miampai kinoinggumuan kotundaan di kapanahak asil kumaa rayat.
Pokionuon dau o tulun ngawi manahak pisokodungan kumaa bogian monguasa kinoiyonon tuh mokimaamaha do koborisian doulu noh soira watas diti mamaramit do Toun Kumakap Keningau.
Nokotindapou nogi id abaabayan dilo nga Momuruan Kotundaan Mogigion Liawan Sahanip Jamil, Kumoduo Upisor Piturubungan Parlimen Keningau Victor Anahong, Potunud Abaabayan dilo Rafie Robert, momuruan mogigion om mongindapu ponombuluian.