Tohu bot, 24 kru Vietnam tinaan do APMM, asil sada nagakom pinolilung
KOTA KINABALU: Tohu tinan bot rawai ih minogovit kiikila 600 kilogram (kg) sada noyopos om 50 kg sada nokoing tinaan do Agensi Popogiotkuasa Maritim Malaysia doiti.
Potunud Maritim Uvang Adam Aziz minoboos do bot dino nokomoi tinaan sabap minogovit koumatan ngavi pamagakom sada tohosok miaga id suvang lisin.
Tinaan do boogizan disido o bot dino kiikila jam 1 sosodopon id kavaigan Pulau Mengalum doos doiti di tadau Kohimo.
Tumanud disido, kinagakaman dino tinoodo ontok ‘Ops Sejahtera’ pinapanau id boogizan kavaigan dino nokomoi.
“Asil pinomolisaan nokoiho do soginumu 24 kru tuhun Vietnam kiumul id binduugan 19 gisom 46 toun kivaa id sakai kotohu-tohu bot dino.
“Suvai ko sada, piipio gulung pukot nokito nogi kikotumbayaan gunoon montok mamagakom sada,” ka disido id iso kopoihaan doiti, koniab.
Minoboos isido do kotohu-tohu bot dino kavasa monoodo kapaagatan mamagakom sada momoguno ‘rawai’ noopo miaga id suang kootulan totopot lisin om okon ko momoguno do pukot.
Tumanud disido, toinsanan asil kinagakaman sada dino nokomoi pinolilung miampai hoogo RM2,900 om kes soizukon id siibo Akta ponginsadaan 1985.