Iso kagu ‘geng’ mamabak lamin nagakom pulis
KOTA KINABALU: Kalapas sominggu kinagakaman ih minamagakom duo ‘geng’ mamabak lamin posorili kakadaian tagayo, iso kagu tinimungan di aparagat papanau kaparagatan mamabak lamin nakaanu tinahan pulis.
Pesuruhjaya Polis Sabah Datuk Ramli Din minoboros do turu ‘suspek’ kikotumbayaan do puru ‘Geng Kelvin’ tinaan di tadau Koduo nakatalib id duo lamin misusuai om iso id bogian posorili Taman Nelly Kolombong Inanam, hiti.
Ka dau, kinagakaman dilo kopoompit do apat ‘suspek’ kusai om tolu tulun tondu kiumur id bindurugan 21 gisom 40 toun.
Miampai kinagakaman koinsanai ‘suspek’, nakaanu o bogian dau minanalasai do 19 kes mamabak lamin kopoompit do anggaran kinorugian kiikira RM800,000.
Minoboros isio do ginumu dilo pinoposiliu ilo do kinagakaman poinggagayo gisom timpu diti idsuang timpu Februari gisom 3 Julai nakatalib.
“Pinonugkuan pinapanau di Task Force Bogian Ponoriukan Jenayah (BSJ) Longkod Upis Pulis Watas (IPD) hiti kiikira jam 2.30 minsusuab gisom 12 tanga sodop.
“Asil tolu pinonugkuan dilo, kiikira RM300,000 ginumu barangan nakaanu minamagahau pialatan dilo nopo nga apat padsakaian, 31 jam longon, barangan amas, 20 talipaun, apat komira, onom komputer riba om apat televisyen.
“Nahau nogi, 0.29 gram syabu, 27 unit koumatan elektronik mogisusuai kawo, 15 kawo dokumen kointutunan tinan, 16 beg, piipiro kaping bingkai numbur koporijistaran padsakaian, om mogisusuai kawo mato tusin kinoiyonon om songkosuaian,” ka dau id pitimbungakan abar koniab.
Minoboros ih Ramli do onom ‘suspek’ dino nokomoi haro rikud ‘jenayah’ laid kamaung noh 10 rikud jenayah ih nasanganu di songulun mantad ‘suspek’ kusai.
Tumanud dau, limo kagu ‘suspek’ kaamung songulun tondu noilaan ‘positif’ dadah kawo syabu.
“Kotolu-tolu ‘suspek’ tondu diti kikotumbayaan do tambalut tondu kumaa ‘suspek’ kusai.
“Iyolo maganu laang montok mongingintong noopo ih mintamong mantad bogian labus lamin om idsuang korita nogi.
“Suspek tondu diti nogi momoguno do kointutunan diolo montok moniwa padsakaian ih gunoon montok papanau kaparagatan mamabak lamin,” ka dau.
Noboros disio do ‘Geng Kelvin’ nogi kiharo toilalaan momonsoi salinan ‘pendua’ montok kunsi mangga di wonsoyon osondikot mantad tampat kinantakan.
Montok padsakaian di pinanakau, kakaal poh bogian dau papanau do ponoriukan om otumbayaan do padsakaian dilo padagangon doid Indonesia maya Sipitang om Lawas Sarawak.
Ka dau, koinsanai ‘suspek’ baino noriman tuminimpuun 5 gisom 11 Julai tumanud Seksyen 457 om 379 A Kanun Koinggoritan.
Tumanud dau, soriukon nogi ‘suspek’ tumanud Seksyen 15 (1) (a) om Seksyen 12 (2) Akta Dadah Koligogon (ADB) 1952.
Id ahal dilo, pinosorou nogi disio mooi do tulun togumu au umompit miampai nunu noopo kara moniaga kopoompit do barang ngawi pinanakau.
Ilo sabap ka dau, momoli om kiharo barangan pinanakau nopo nga iso kasalaan tumanud Seksyen 411 Kanun Koinggoritan.
Nokotindapou nogi id pitimbungakan abar dilo nga ih Kumoduo Pesuruhjaya Polis Sabah Datuk Razarudin Husain om Boyoon Pulis Watas Kota Kinabalu Asisten Komisioner M. Chandra.