Projik momutanom id kakadazan Labuan
LABUAN: Abaabazan Balajalan Poimbida Pisompuuvan (PPKI) Sikul Kabansaan Rancha-Rancha minonoodo projik pomutanaman id natadon sikul sinakadai do Upis Pomutanaman Labuan.
Potunud Upis Pomutanaman Labuan Mohammad Taufik Johari minoboos abaabazan pomutanaman kakadazan kituduvon do popoinsavat koingatan om kaanangan kumaa kogunaan pomutanaman sabaagi panamba montok kounsikaan om kosindakan pososoihi do mogigizon kakadazan.
Ka disido, projik nakapanau dii okito agazo kouuto om kiasil kumaa sikul.
“Ogumu koumbosian anu maza abaabazan diti, abaabazan i noikot vinasi om sakadazon do kopolintaan. Ahapas iti, kavasa tokou do momusoou do mogovit do projik pomutanaman notoodo diti mooi do hobi otunda id timpu touvi,” ka vagu disido.
Ka disido abaabazan diti kaanu popogiot sunduvan do momutanom id susumikul.
“Izioho mositi tumimpuun miampai mananom doid tana. Songian kikabaahan, kavasa izioho mananom hidroponik,” ka disido.
Nunsub disido o susumikul do mananom timpu tahaid miaga limau, hado om talung. Mositi do opusik do mintamong tinanom naait gisom i do kivao asil taanu.
Upis Pomutanaman Labuan nakapanakadai sakaping tana montok pananaman hinsou miaga kinotuan, sangkung om gandum om suvai po.
Ontok dii, huguan tagazo mongingia SK Rancha-Rancha,Norinnie Kassim minoboos, ogumu kavo abaabazan notoodo id sikul mongiho susmikul poimbida au kopipit mantad kotundaan dino om vookon dioho maza abaabazan pomutanaman id kakadazan diti.
Norinnie minonongkotohuod kumaa Upis Pomutanaman Labuan sabap minomihi do sikul dii do papahantoi Abaabazan Pomutanaman Kakadazan.