Iman-imanon Pakatan monguasa Putrajaya maid-laid minsodu aiso sokodung PAS: Salleh
KUALA LUMPUR: Iman-imanon Pakatan Harapan montok monguasa do Putrajaya id pomilian tagayo ginumuan ko-14 (PRU14) maid-laid minsodu miampai aiso sokodung pongundi PAS sumusuut parti dilo ih baino diti au nodi miamung miampai pakatan gugumaga.
Montiri Komunikasi om Multimedia Datuk Seri Dr Salleh Said Keruak minoboros do kinodimpotan tagayo DAP om PKR id PRU 2008 om 2013 nopo nga sabap sokodung PAS ih mironit idsuang Pakatan Rakyat (ih nokolosod nodi om gugumaga baino diti minonuridong piromutan kawawagu nointutunan sabaagi Pakatan Harapan).
“Miampai aiso nodi sokodung pongundi PAS, tantu noh do DAP om PKR au nodi agaras.
“Ondomo nung aiso PAS, soginumu 70 paratus pongundi PAS id PRU 2013 au nodi mongundi pakatan gugumaga? Miampai kinowolihan undi soginumu diti, kagarasan gugumaga tantu do olunggui,” ka dau id ponuratan id bolg dau sskeruak,blogspot.my, koniab.
Tumanud Salleh, PKR om Parti Amanah Negara au obuli monulung gugumaga montok mamagayat undi Malayu sabap goduo-duo parti dilo aiso tapak pulitik di ogirot om pironitan diolo olunggui.
“Miampai kokudian diti, tantu do Pakatan Harapan ih wagu pinoturidong au kaanu kotumbayanan pongundi,” ka disio.
Kinodimpotan tagayo DAP idsuang pulitik pogun, ka di Salleh, nosigampot id PRU 2008 noopo soira minisokodung miampai PAS om nokopongintong do DAP nakamanaang 28 tirikohon om PKR 31 tirikohon. Maya pisikodungan potilombus miampai PAS ontok PRU 2013, DAP nakamanang 38 tirikohon om PKR (30).
“Gulu poh ontok DAP tuminanding sosondiri, kinodimpotan parti dilo nopo nga osodu mantad kopongunsub. Ontok PRU 1969 ontok gugumaga nakamanang tagayo, bulun noh DAP nakamanang 13 tirikohon, 1974 (9), 1978 (16), 1982 (9), 1986 (24), 1990 (20) om 1995 (9),” ka Salleh.
Kiginumu 84.84 paratus luminabus minongundi mantad ginumu 13,268,002 pongundi nokorijisto id PRU13 miampai koputusan Barisan Nasional (BN) nakaanu 5,237,699 undi, PAS (1,633,389 undi), DAP (1,736,267 undi), om lobi dilo parti ngawi suai.
“Sundung pia, sususuian nokopokito do PAS nopo nga gamut doid kagarasan BN. Baino kopotopotan dilo, DAP nopo nga gamut doid Pakatan Harapan,” ka disio.- Bernama