Rabies: 19 kes wagu id Serian

KUCHING: Opod om siam kes kawawagu kinokot tasu om tingau pinoruput nantakan koniab pinoposiliu do kiginumu 26 kes kinokotan noilaan mantad 2 gisom 6 Julai diti.

Upis Monunurat Tinan Kaantakan Taraat Pogun Sarawak minoboros do iti pinoposiliu do kes ‘kumulatif’ kinokotan tasu mantad podi 1 April gisom baino diti nopo nga kiginumu 332.

Suai ko ilo, kiginumu 235 tulun nokorikot noh montok kapaganu do pangajaruman montok tayam piniara diolo, ka do upis monunurat dilo id kopoilaan hiti, koniab.

Tumanud upis monunurat dilo, Koupisan Kotorinaan Veterinar Sarawak (JPVS) nakapangajarum noh do kiginumu 5,850 tinan tayam piniara kaampai mantad 1,626 tinan tasu, 2,810 tingau om 23 tayam suai gisom baino.

Kosodop, kiginumu 516 tinan tasu om 1,019 tinan tingau mantad 263 sanganu tayam nonuan ponodokan (vaksin) id posorili kakadaian Serian om kopoindalanan dilo potilombuson kagu tumimpuun jam 10 kosuabon gisom 4 sosodopon id tiyonon iso’i koniab.

Pinapaharo nogi JPVS do 68 kimpin kopurimanan kokomoi ‘wabak rabies’ id bogian kongoompit ih notindapou di 4,862 mogigion kampung om susumikul ngawi.

“Potilombuson do JPVS o kaparagatan ponoriukan kes ngawi ih pinoruput kikoompitan modroliu Rabies id posorili bogian Serian,” ka upis monunurat dilo.

Iyolo ih kinokot tasu id bogian dino nokomoi nogi pokionuon rumikot tosisiap montok papanau do pomorisaan om ‘vaksin’ id klinik om lamin pongusapan songindoros.

Ontok timpu diti, onuan ‘vaksin’ montok kes nokokot tasu om tingau ih nantakan id bogian modroliu ih kopomogonop do kooturan ‘klinikal’.

Gisom baino modroliu Rabies id Bogian Serian nokopongorundun do tolu tangaanak. -Bernama