Pilio noh porinta ih tototopot kikoinsamadan
Kogunoon mogigion kampung om kakadaian au miirad - Ewon
RANAU: Kogunoon om kouhangan pialatan mogigion ih poingiyon id kampung om id kakadaian au miirad.
Puru Parlimen Ranau Datuk Dr Ewon Ebin minoboros do tumanud do pisuaian dilo noh au obuli anggapon do kinalantaian toiko kuasa bogian gugumaga ih koubasanan do kamanang id bogian kakadaian kakadaian ontok pomilian tagayo sabaagi iso ponukuan montok mamagatang do kagarasan toiko kuasa diolo.
Tumanud dau, sundung pia doti goduo-duo bogian tulun ngawi dilo miirad mantad kawo bana, agama om ‘ideologi’ pulitik nga kogunoon diolo nopo nga oindamaan misusuai doulu noh mantad kawo ‘ekonomi’ om balajaran.
“Mantad dilo, gaab bogian gugumaga montok monimban toiko mangala koporintaan Barisan Nasional (BN) ontok pomilian tagayo ginumuan timpu rumikot okon ko iso ahal asanang sabap mogigion kampung kakaal atatap momoguno do kotundaan di kaanu posodiaon do BN.
“Mogigion kakadaian ih nogonop miampai nunu noopo kogunoon kounalan kangaam doti montok diolo momili ralan pulitik sompori-pori katapi mogigion kampung ih kakaal tuuhan do kotundaan tantu noh do momili porinta ih totootopot kopio kiginawo/kikoinsamadan kumaa kogunoon diolo,” ka dau.
Noboros dau ahal dino ontok minanahak boboroson id pinonimpuunan linominon Dewan Mini Kampung Nampasan baru om abaabayan momuruan songowian rayat id Kampung Poring.
Pokionuon di Ewon o toinsanan rayat mooi lobi koilo mamagatang om momili porinta om momuruan di posodia mongigit pomorintaan kalapas pomilian tagayo ginumuan sabap nung asalaan momili oinggorit doti iyolo solinaid iso gontob.
“Sokiroko bogian gugumaga nakatantu do kamanang id pomilian tagayo timpu rumikot, iti komoyon do porinta wagu ih tinuridong dilo tumimpuun mantad aiso piagalon porinta posodia haro om minog do papanau om monginsonong do pamalanan kotundaan psodia haro noopo,” ka dau.
Pinosorou nogi dau o rayat mooi do au oindamaan oimbayatan miampai nunu noopo batos do tinan gugumaga sabap toinsanan dilo koubasanan do kosoribau ontok orikot timpu pomilian tagayo noopo.
Ka dau lobi osonong onuan sokodung au opibahagi kumaa momuruan om porinta posodia haro mooi do undi ‘majoriti’ di aanu diolo obuli silihon harata om sunduan di togirot montok momuruan monuntuk ‘hak’ rayat.
“Rati diti, nung momuruan ih lumansan dotokou kamanang tagayo id pomilian tagayo om tantu do au tokou mosi-rosi montok mokianu poruntukan lobi kangaam miampai watas tokou di oindamaan agayo montok potundaon piagalon pogun suai id Semenanjung,” ka dau.
Pogului Ponorikohon JKKK Kg Nampasan Baru Jerome Kangoi minoboros do Dewan Mini dilo nookunan noh di Ewon ontok koimpupuson toun 2015 om baino ilo nopongo nodi om obuli nodi gunoon.
Ka dau, odomut toiko osikap nunu noopo projik kotundaan ih pokionuon do mogigion mantad porinta okon ko iso kobolingkangan sabap ilo tumanud doid piipiro ahal.
“Onu ih kiguno, mositi do alanut ginawo om kaandad tokou sabap kotutukon dilo tantu kaanu tokou onu kounalan ih kouhangan tokou,” ka dau.
Namot dilo, Kumoduo Ponorikohon JKKK Poring Junis Radani mokianu mooi do koinsanai poingigit tirikohon BN watas Ranau, doulu noh Ewon ih kikosianan om kikoinsamadan kopio om nogi aparu minsuang kakampungan mongintong do kobolingkangan rayat, poingkakatonkawagu id pomilian tagayo ginumuan do tiinu.
Id ramai id Kg Rampasan Baru, pinopolulus Ewon do poruntukan kiginumu RM4,000 montok pomolian kipas dewan, RM3,000 montok pomoli koumatan sipoot ping pong, RM6,000 montok pomonsoi dapur om stro om RM4,000 kagu montok kogonopan dapur om mikrofon Dewan Mini.
Id Kampung Poring, pinopolulus nogi isio do poruntukan kiginumu RM25 noribu montok pomonsoi talun alun pakaayan id bogian pomutanaman om pomutayaman mogigion kampung di oindamaan otidong om alamou doulu noh ontok timpu rumasam.
Nokotindapou nogi id abaabayan dilo nga Upisor Poimbida Parlimen Gundohing Japirin Sahadi, Monunurat Pulitik om Monunurat Tolosok Datuk Siringan Gubat, James Ingguru om Jaibi Dualis, Boyoon Komulakan Upko Kabansaan Arthur Sen, Upisor Kotundaan Mogigion Paginatan Georgina Leong om momuruan songkoiyonon.