MINSINGILO BOROS KADAZANDUSUN APASI BOROS, APASI TINARU

Nulud di Tatak Barambang

BOROS Kadazandusun kosudong singilaan timpu baino diti moi do au atagak mantad dila sinakagon. Boros KD milo gunoon id pibarasan miagal diti pinibarasan di Jena om i Jimmy (pomungaran noopo okon ko ilo tulun sangaran otootopot) montok kopogiturubungan do toinsanan tulun Kadazandusun id pogun diti. Kopisanangan do mambasa. Jena: Kagarasan do tulun mamamasok sandad id pogun diti i kaampai no tulun Kadazandusun nopo nga kiharo tana diolo nitahak porinta ii kigaran do Native Title (NT). Jimmy: Otopot. Nga haro wookon tulun KD di au koilo kogunaan tagayo tana dino. Jena: Nunu komoyon nu? Jimmy: Papataran tana kumaa mongingindapu mantad kakadayan miampai au ondomon piro kinudi toi ko gimumu tusin pokionuon kagatang di tana. Jena: Apatut sumuku po daa yolo boyoon kampung toi ko Huguan Siou pogului papataran do tana. Jimmy: Okon, okon ko miagal di komoyon ku. Nung yoku yolo, au ku taranon tana ku. Umoon ku i tana. Jena: Wookon tulun KD kiharo matuu gia lobi iso garan tana om taranon di i garan koduo tu gunon diolo ih tusin. Jimmy: O, nga nung haro daa kooturan di mogodu tulun KD papataran tana, au daa yolo pataran. Jena: tumanud tosorou ku, milo yolo paptaran tana nga kada tarano kumaa tulun sombol. Jimmy: Apatut orubatan yolo di tana. Jena Poingkuro orubatan do tana nung aiso noh toilalaan mongumo? Jimmy: Pisokodungan Popoburu Kampung (KPD) no daa i lansanon do KD popomogot toilalaan momutanom id labus kakadayan. Jena: O, nokuro ma di KPD baino tu au nodi awakas miagal di pogulu? Jimmy: Nowian tusin ka do norongou ku nga au ku noilaan nung otopot. Jena: Nobingkarap? Jimmy: Au nogi nobingkarap bo nga au noh doti koimbogui mongusin do porojik tagayo dino miampai okudian po do kabaalan om toilalaan momutanom. Jena: Okito ku tulun mongingindapu mantad tinaru tagayo no i momuruan do KPD timpu baino. Jimmy: Tulun Sina kogumuan momutanom id labus kakadayan miampai tulun okon ko tulun KD onuon diolo kumaraja momutanom. Jena: Kito nogi gia nga momomoli okon i ko papataran.

Jimmy: Nga au oku momoli rapaon dagangon do tulun songkosuwaian. Momoli oku mantad di papadagang KD noopo. Jena: O iri no tawasi wonsoyon tokou. Kopuriman ko mongupus om mongobi tulun mantad tinaru sondiri. Jimmy: Osianan oku tulun tokou Jena: Yoku nga osianan diolo. Jimmy: Ba, Judith nung osianan kito, nunu di apatut mangan kito? Judith: Id gulu kopiyo, oduhan kito isai nopo tulun KD do papataran tana. Suhuon kito yolo mongukab tana pomutanaman do kouwaan, gata, tupolo, punti, piasau tumau om susuai po. Jimmy: Tulun KD no apatut ogumuan tusin id labus kakadayan. Jena: Awasi i do ogumu tulun KD poingkaraja toi ko mongindapu id kakadayan do naamot ogumu nogi i momutanom id labus kakadayan. Jimmy: Jena, timpu kito mawiawi no. Haro lombuson ku diti om magabagab oku nogi. Jena: Hino ko no om intang-intangan Jimmy: Hiti ko po. Intang-intangan nu nogi dika