Tadau Paganakan G3PNS 2017 August 4

Koisaan Moniaga om Moniaga Tonini Pogun Sabah (G3PNS) papaazu kalamazan tadau paganakan dosido ontok August 4 doid KDCA Penampang.

Ponikoon mangazu, Augustina Girith minoboos mogikaakavo abaabazan naazu montok kosindakan do kalamazan apat tadau dino i nokotimpuun mantad po August 1.

“Tuduvon nopo do kalamazan diti nga popogiot pikouvangan paganakan id piahatan puu koisaan om ginumuan do monoodo sunduvan songovian om pisompuuvan. Suvai ko ino, kalamazan diti nga kaanu nogi do mogukad kabaahan humozou om kovovosiai maza abaabazan ngaavi pasamazon,” ka vagu dii Augustina.

Vookon abaabazan nopo nga Piboian Tombituon G3PNS, Buvazoi Tavantang G3PNS, Tati Tongingo G3PNS, pokitanan om padagangan tampat takanan om minum om pipio po vagu abaabazan miaga sukaneka om pangaan hozou pomohiis.

Abaabazan tosindak kozo id kalamazan diti nopo ngaontok August 4 tumimpuun doid 6 minsosodop id nombo kivao piboian panantaban Buvazoi Tavantang om Tati Togingo G3PNS om kangaan hozou mantad huhumozou naahap i kaanjul id Hintuun KDCA. Ponimpuutan tikit kinasip nga kivao nogi om manaak vava kagazat montok dii kotindapou.

Augustina minonongkotohuod kumaa toinsanan nakasakadai kaamung radio Kupi-Kupi FM, Mary Kay- Audrey Wilson, Nelson Photography, Eminent Hotel, Millenium Video Production om ginumuan.

Monunuat tagazo KDCA, Datuk Ir John Anthony popoimagon do Tadau Paganakan G3PNS ontok kosodopon Kohimo doid 7.30 doungosodop.

Ginumuan ahapon do tumindapou om kosuangan nopo nga aiso kabalai.