‘Program Rehiring’ nopupusan baino
# 1,088 noh pakakaraja songkosuaian nokorijisto idsuang timpu onom wulan
KOTA KINABALU: Abaabayan Panggajian om Pongiyanan Kawagu Modidikot Songkosuaian Aiso Kasagaan (PATI) id Sabah (Program Rehiring Sabah 2017) opupusan suab (baino) om au potilombuson, ka di Potunud Koupisan Imigresen Sabah Musa Sulaiman.
Minoboros isio do abaabayan kitujuan manahak kosiwatan kumaa PATI ih pakaraja miampai aiso kasagaan id Malaysia, doulu noh id Sabah, nonuan poomit karaja totopot dilo pouhanon solinaid onom wulan tuminimpuun 15 Februari om torinaon di komponi Inti Padu Technology Sdn. Bhd, komponi ih linantik koporintaan pogun.
“Idsuang ahal dilo, posorohon ku o touki montok maganu kosiwatan poporijisto do pakakaraja diolo do naamot haro timpu. Iti sabap, kalapas diti (au papanaon abaabayan dilo), Koupisan Imigresen monimbang montok maganu laang tokodou kumaa parti nung noilaan kakaal moningolig pakaraja toiko mamagaji pakaraja aiso pas tototopot,” ka dau id pitimbungakan abar hiti koniab.
Minoboros ih Musa do kiharo 1,088 pakaraja songkosuwaian pinorijisto di touki id suriba abaabayan dilo mantad podi ino pinapanau, osodu mantad pokirikotan timpuuni pogului diti ilo nopo nga 50,000 tulun.
Minoboros isio do momonsoi o bogian dau do pongintongan om mongilo natadon abaabayan dilo au nakaanu pangaramitan id pialatan touki id Sabah.
Id ningkokoton kikoopmitan, noboros di Musa do bogian monguasa pogun nakaakun noh montok momonsoi kooturan pamaganuan pakaraja songkosuaian id pogun diti kapaamung do kopolombusan kooturan kotontuon umur gisom 60 toun montok pangapalaian wagu om kopolombusan Pas Kotumbuluian om kotumbuluian Pas Kotumbuluian Karaja sosial (PLKS) id toinsanan bogian.
Tumanud dau, timpu kotorinaan pakaraja songkosuaian nogi pinotilombus mantad timpu ‘maksimum’ 10 toun kumaa 15 toun.
Goduo-duo kooturan diti pinogirot kuasa notilombus, ka dau.
Namot dilo, noboros di Musa do bogian dau nokopomorisa do kiginumu 23,563 tulun maya do 793 operasi di pinapanau id pointongkop pogun mantad 1 Januari gisom 31 Julai nakatalib.
Mantad dinumu dilo, ka disio,kiginumu 2,738 tulun nagakom sabap minomonsoi kasalaan pialatan suai aiso poomit, poingiyon nokolobi timpu, nakadandang kooturan pas om ‘dokumen’ palsu.
Tumanud dau, kiginumu 60 touki nogi nataan montok ponoriukan potilombus sabap noilaan minomonsoi kasalaan mamagaji pakakaraja songkosuaian aiso pas tototopot om moningolig PATI. -Bernama