Minanahak kopoilaan au otopot: Mongingia nontok walu toun om danda RM10,000

KOTA KINABALU: Kuut Takawas hiti koniab pinopoingkawas do jiil kumaa walu toun om pinopotindohoi danda RM10,000 kumaa songulun bagas mongingia sabap kasalaan minanahak do kopoilaan au otopot (pilasu).

Hakim Datuk Nurchaya Hj Arshad minomonsoi do koputusan dilo kuminaa di Amir Hassan Ali Hussin, 51, kalapas au minonorimo pokinsianan sabap ukuman.

Idsuang pinangakiman dilo, noboros di Nurchaya o kuut do au popologos do susuap om araatan koimaan taraat dilo.

“Mananahak susuap nopo nga ‘parasit ekonomi’ pogun. Tinan Monorina Pomunsaan Susuap Malaysia (SPRM) minggisom kumaraja om ontok kinotutukon dilo, nung au tokou linongosn osiliu doti do momiraag,” ka dau.

Sokiro ko au kaanu mambarai danda dino nokomoi, ontokon jiil solinaid timpu tolu wulan.

Ontok 10 Oktober toun nakatalib, hakim Kuut Sesyen pinaparatu do ukuman jiil tolu toun om danda RM10,000 kuminaa mokiinsian, kalapas noilaan kisala.

Amir Hassan pinapatahak iso dokumen pason porinta kuminaa ejen Boyoon Seksyen Baraian Koupisan Akauntan Pogun Malaysia, montok monombirang ‘prinsipal’ koupisan dilo.

Ilo nopo nga, minanahak do kopoilaan pilasu kokomoi do ‘perakuan’ do barangbarng pakaian sipoot om ‘uniform’ montok tangaanak Tabika Kemas 2009 nakatahak noh.

Kasalaan dilo winonsoi pialatan 30 Disember 2009 gisom Januari 2010 hiti.

Pogului, luyar Goldan Hamid luminansan mokiinsian pinopoboros do ukuman di porotuon kuut tosuriba awagat kopio.

Kumoduo Mangadawa Tagayo Rohana Abd Hadi mantad SPRM pinopointarang do ukuman di pinongontok kuut tosuriba nopo nga koontok om mokianu koputusan dino do potimporonon.

Id ahal dilo, au nogi tinorimo di Nurchaya o kopokionuon di Amir Hassan montok popoluntan papanau do ukuman dilo naamot magandad koputusan pangapilan id Kuut Pangapilan.