84 touki pinoposodia do 4,753 pakarajaan
# ‘Program Kembara Kerjaya’ pinaharo solinaid apat tadau tuminimpuun koniab
KOTA KINABALU: Kiginumu 4,753 kokosongan karaja mogisusuai ‘sektor’ om ‘kategori’ pinosodia id ‘Program Kembara Kerjaya Kebangsaan’ 2017 kopokito do ‘Train Ride Sabah’ ih pinaharo solinaid apat tadau tuminimpuun koniab.
Boyoon Monunurat Komontirian Kotos Tulun Datuk Seri Adenan Ab Rahman minoboros do abaabayan ih kuminsan nogi pinaharo id Sabah dilo kiharo id apat tiyonon misusuai tuminimpuun id Stesen Keretapi Tanjung Aru, Beaufort, Tenom om opupusan id Sipitang kopoompit do tumongkop miampai keretapi om konvoi padsakaian 4WD.
“Kiginumu 84 touki mantad mogisusuai bogian kaamung noh tumau om gas, kotorinaan, pamansaian om pomukadaian om walu poposodia pingludaan nakatanud nogi id minghombo nonggo noopo mogium karaja ngawi diti. Alansan oku do abaabayan diti osiliu osuhatanan kumaa tinimungan mogium karaja om touki montok rumuba miampai ‘simbosis’ dilo.
“Alansan yahai do kosiwatan di pinatahak idsuang minghombo nonggo noopo mogium karaja diti gunoon tososonong di tinimungan mogium karaja id pogun diti,” ka dau id abaabayan pinonimpuunan minghombo nongggo noopo mogium karaja ngawi dilo hiti koniab.
Teks pason dau binasa di Kumoduo Boyoon Monunurat (Operasi) Komontirian Kotos Tulun Datuk Mohamed Elias Abu Bakar.
Minoboros Adenan do pisokodungan ih pinatahak di bogian touki id abaabayan dilo kotilombus nogi monulung porinta mongingkudi do ginumu aiso karaja id pialatan sukod ngawi tomulok.
“Mantad dilo pokionuon ku tuh toinsanan mogium karaja id pogun diti au oindamaan momili karaja id koyuon ‘ekonomi’ di au atantu ontok timpu diti.
“Sokiro ko muhang momoruhang toilalaan, ahawo noh kosiwatan montok papanau do pingludaan toilalaan di pinosodia porinta maya do poposodia pingludaan di nokoompit id suang abaayan minghombo diti,” ka dau. -Bernama