Tina noduso, tanak nosindualan
# Padsakaian norulun liud tagayo
TAWAU: Kinantakan taraat liud id Bawang Felda Tengah 01 Kalabakan, hiti di tadau Kaapat natadon songulun tondu kiumur 49 toun minidu pogun kalapas rinulun waig tosolog miampai korita dau.
Boyoon Pulis Watas Tawau ACP Fadil Marsus minoboros do tinan munggui, Jamurin Pangandai @ Maimeh nokito do mogigion kampung, id kosoduo kiikira 500 meter mantad tampat kinantakan kiikira jam 11.50 kosuabon.
“Pinapanau karaja mogium om manampasi mantad pulis Kalabakan, Bomba om Manampasi Tawau, pulis sakadai Felda Kalabakan om Bomba Sukarela Kalabakan.
“Kiginumu 125 mogigion kampung nakaamung nogi pinapanau karaja mogium id posorili tampat kinantakan om bogian songindoros,” ka disio hiti koniab.
Tanak kusai munggui, Denny Lauji, 21, ih nosindualan nopo nga pinokiubatan tosikap id Klinik Kolidasan Kalabakan pogului pinokiubatan sabaagi sumakit labus id Hospital Tawau.
Minoboros Fadil do mianak-anak dilo id pindalanan mantad Ranau suminakai padsakaian 4WD om maya daa tiyonon tong sampa Felda Tengah 01, kiikira jam 1.40 minsusuab.
“Poingkuro poh nga, waig noilaan nokotimpuun noh nakalabpai (minonutub) ralan pakaayan id Kretam, kinontodonon diolo pinopoundorong korita montok do naamot timpu.
“Ontok timpu diri, tanak munggui minindahu mantad padsakaian om minonukat korolomon waig minomoguno kakod om nokoilo korolomon waig nokorikpt noh id rontob poo.
“Duo jam kalaaps dilo, insan poh kagu tanak munggui minonukat korolomon waig minomoguno do kakod dau om nokoilo do waig nokosonod noh id rontob siribo totud,” ka dau.
Minongomi potilombus, minoboros isio do tanak munggui kalapas dilo suminakai korita om suminaap waig liud, nga tigog do guminayo liud mantad ponong gibang om minongorulun korita diolo.
Tumanud dau, id koyuon natagakan pomusarahan, tanak kusai munggui luminabus mantad padsakaian om minamabak soromin montok manampasi tina dau om nokosiwat minongigit longon molohing dau.
“Nga pinongigitan longon munggui nouyad mantad tanak dau sabap waig liud di osolog kopio om tanak munggui mininggisom mogium molohing dau nga au nakaanu,” ka disio.
Papanau karaja mogium om manampasi tiningkodan kiikira jam 12.15 tangadau, om tinan munggui ih nokito kiikira 500 meter mantad tampat kinantakan nopo nga nowit doid linimput tinan Hospital Tawau montok pokizazakan monoriuk.