Tina noduso, tanak nosindualan id kinoligaganan talun alun
TAWAU: Songulun tuminaap motosikal tondu noduso id koligaganan talun id Batu 25 Ralan Apas, hiti, kiikira jam 2.45 sosodopon tadau Kaapat.
Kinoligaganan dilo kopoompit do motosikal kawo skuter ih sinakaian duo mianak-anak miampai padsakaian 4WD pinapanau songulun kusai.
Kinoilaan do mianak-anak dilo wagu poh kouli mantad minomoli panganas id Taman Sawit Balung montok koposodiaan mamaramit korikotan Tadau Raya Aidiladha, pogului kinantakan.
Boyoon Pulis Watas Tawau ACP Fadil Marsus minoboros do tuminaap, Bulan Tangah, 60, minidu pogun sabap noindamaan nosindualan id ponong tulu.
“Tanak tuminaap, Rosnani Nasir, 18, ih pinapanau motosikal nopo nga nosindualn id tulu, totud om siku gibang wanan,” ka dau hiti, koniab.
Minoboros Fadil do goduo-duo mianakanak dilo poingiyon id Kg Nasib Kita, om pinapanau padsakaian 4WD, kiumur 29 toun nopo nga poingiyon id Batu 2 Ralan Apas.
Tumanud dau, pinonoriukan timpuuni nokoilo do kinoligaganan nantakan ontok padsakayan 4WD ontok id pindalanan mantad Kakadaian Tawau pakaayan doid Semporna.
“Soira padsakaian dilo kiharo id ralan wanan, iso motosikal mantad ralan gibang minonimban ralan dau doid ralan wanan miamapi minonigowo.
“Koyuon dilo natadon papapanau padsakaian 4WD minongulok berek om pinopokilong do kurita dau doid ponong gibang montok mongilag.
“Nga, korita dau nakalanggar motosikal dilo mantad tohuri sumusuhut piwolitan di osomok kopio, natadon motosikal dilo nagayat doid tanga ralan,” ka dau.
Minoboros isio do tuminaap motosikal di au minamakai topi keledar pinatantu do minidu pogun ontok id pindalanan pakaayan doid Klinik Balung.
Baino diti, ponoriukan kes dilo kakaal potilombuson om papanaon tumanud Seksyen 41 (1) Akta Padsakaian Ralan 1987.