Duo noduso, tolu natampasi soira kapal minogowit muatan tumau petrol notutudan
KUDAT: Duo kusai kaamung ‘tekong kapal’ noduso om tolu ih suai natampasi soira kapal ih minogowit muatan tumau petrol notutudan id kawaigan Laut Kampung Padang Pulau Banggi hiti di tadau Kotolu.
Boyoon Pulis Watas Superintenden Douglas Nyeging Taong minomisunud hiti di tadau Kaapat minoboros do munggui ih noduso nopo nga Sahlan Afdan, 26 ih ponogi ‘tekong kapal’ mantad Kampung Kobong Pulau Banggi om Jaafar Junaidi, 61mantad Kampung Indahlupi Pulau Banggi.
Ka dau, tolu ih natampasi kampai mantad Mohamad Kamaludin Jaafar, 26 mantad Kampung Indahlupi Pulau Banggi, Azmain Nowali, 45 mantad Kampung Padang Pulau Banggi om Mohamad Nasaruddin, 10 mantad Kampung Indahlupi Pulau Banggi. Kolimolimo diolo nopo nga rayat kinoiyonon.
“Kotolu tolu munggui ih natampasi nowit doid Klinik Kolidasan Karakit montok pokiubatan om kalapas dilo nowit doid Hospital Kudat minomoguno bot tinimungan APMM Kudat montok pokiubatan potilombus,” ka disio.
Noboros di Douglas do ontok 30 Ogos kiikira jam 7.04 dongosodop, DCC Longkod Upis Pulis Kudat nokotorimo pamalahauan mantad 999 RC Melaka om minoboros do miamapi pinoporulut kingaran Konsui ih minoboros do kiharo iso kapal notutudan id kawaigan Kampung Padang Pulau Banggi Kudat.
Ka disio, tumanud pinonoriukan pulis, ontok kinantakan kiharo limo tulun munggui kiharo id suang kapal dilo kikotumbayaan minogowit muatan tumau petrol mantad Kudat pakaayan doid Kampung Padang Pulau Banggi.
Tumanud disio, kapal dilo nopo nga sanganu tapa kumaa songulun mantad munggui, Sahlan ilo nopo nga ‘tekong kapal’ dilo.
“Duo munggui pinatantu do minidu pogun mantad bogian Klinik Kolidasan Karakit om tolu kagu munggui natampasi om pinokiubatan id klinik dilo.
“Asil pinonguhotan mantad munggui ih natampasi minoboros do natadon kinotutudan di nantakan nopo nga mantad injin bot ih notutudan sabap noindamaan alasu om minongontok iso mantad tong ih kisuang tumau petrol,” ka disio.
“Laang minogowit koinsanai munggui doid Klinik Kolidasan Karakit montok pokiubatan om kotolutolu munggui ih natampasi owiton doid Hospital Kudat minomoguno do bot tinimungan APMM Kudat montok pokiubatan potilombus,” ka dau.
Noboros di Douglas do toinsanan munggui ih natampasi nopo nga pinisokodungan tulun kampung ih minonulung minogium munggui.