Tinaru Sina mositi momusorou kawagu montok kowosian songowian: Teo
KOTA KINABALU: Tinaru tulun Sina id pogun diti mositi do momusorou miampai totootopot do tumilombus nangku iyolo monokodung guguma ontok Pomilian tagayo Ginumuan ko-14 (PRU14) sabap do kopoposion mogigion ngawi diti aiso kinoburuon mantad podi PRU nakatalib.
Montiri karaja-Karaja Poimbida Datuk Teo Chee Kang minoboros do sokodung tulun ngawi Sina kumaa Barisan Nasional (BN) nopo nga kiguno kopio ontok PRU14.
“Mositi papatantu tokou do mogigion ngawi diti haro lansanon di koula idsuang ponorinaan montok maganu laang sabaagi ‘sunsuyon’ id pialatan porinta om tulun ngawi Sina.
“Potonuon tokou ahal diti antakan, sokiro ko kotilombus BN onuan kuasa ontok PRU14,” ka dau id Abaabayan Kinouliton Toun ko-42 Gabungan Koisaan ngawi Hokkien Sabah om Tana Pisompuruan Labuan, om Abaabayan Koposilihan Komiti Longkod, Komulakan om Koonduan wagu hiti, ontok sodop Kolimo nakatalib.
Minoboros isio do kopongintongan papanaon kalapas PRU nakatalib, tulun ngawi Sina id pogun diti okitonan napalid om natagak pakayaan soira bogian gugumaga ih nundi diolo okon noopo au nakaanu pinopotopot batos nga natagak ralan pakayaan nogi.
“Ahal diti okon toiso-iso ih winonsoi-wonsoi katapi sokiro ko tuminanud kou ruputan abar solinaid diti, obuli kou mintong pakatan gugumaga (Pakatan Harapan) okito kopio baino mogibababak.
“Miodu iyolo id pialatan iso om suai doulu noh id suang ahal misokodung miamapi PAS.
“Moboros kokomoi PAS, otumbayaan oku do toinsanan ih nokotindapou hiti karati waya dilo sokiro ko PAS osiliu agaras kalapas diti,” ka dau.
Miampai au minomungaran parti, pinatarang nogi di Teo do kiharo parti gugumaga baino ih haro sokodung tagaras mantad tulun ngawi Sina maganu laang montok au momonsoi nunu noopo montok popotingkod do atag misokodung id pialatan Pakatan Harapan om PAS.
“Poingkuro poh nga, au oku momirubat timpu manahak ‘komen’ kokomoi pibabakan ih masaon antakan id pialatan parti gugumaga baino.
“Alansan oku noopo, tokou sabaagi tulun ngawi Sina obuli momusorou miampai totootopot om uhoton tinan sondiri do oruhangan winasi nangku kopoposion tokou sokiro ko toinsanan tumilombus monokodung gugumaga ontok PRU14 om muhang tumimporon id koyuon kopoposion miagal baino,” ka dau.
Teo ih nogi Porosiden Parti Liberal Demokratik (LDP) minoboros do ekonomi pogun id suriba kopomuruanan Luguan Montiri Datuk Seri Najib Tun Razak maid-laid tumunduli miampai mogisusuai papaapu labus ih poposiliu Malaysia sabaagi tiyonon paapuan.
Otumbayaan isio do bogian gugumaga papalabus doti do mogisusuai kopoilaan di obuli popoompuong rayat ontok PRU14 diti.
Nokotindapou nogi id abaabayan dilo nga Porosiden Gabungan Koisaan Ngawi Hokkien Sabah om Tana Pisompuruan Labuan Datuk Seri Panglima T.C Goh.