Sinding Kadazandusun di nosupu apatut posolimboon id tv om astro
ISO kokitanan tosonong nopo nga nung intangan om kinongohon tokou id posorili, ogumu tulun Kadazandusun do mogiboros id boros tina. Om nung mokinongou tokou kosolimbaan boros Kadazandusun id radio VFM, korongou tokou sinding tokou togumu om kouyuuyuon loyou om roiton sinding id boros Kadazandusun i osonong kopio lumabus mantad kabang do DJ Kadazandusun i kusai om tondu.
Ih loyuk kabarasan di songulun tondu nga oomis om olumis kopio karangahan do moboros boros tinaru. Nokuro tu au tokou kosiwat toi maganu kosiwatan mokinongou koposolimbaan boros tinaru tokou id radio? Adalaan manaku agangau tokou mintong do abaabayaan astro i sumolombou momoguno boros tinaru suai. Om nokuro tu mantad timpuuni om gisom do timpu baino, aiso o abaabayan Kadazandusun i posolimboon id tv toi astro id pogun diti?
Au manaku koilo o tulun Kadazandusun do momonsoi abaabayan i milo posolimboon id astro? Tinaru suai haro abaabayan nga tinaru Kadazandusun aiso po. Mantad no do aiso koposolimbaan abaabayan doung Kadazandusun id astro dino do nosiliu nodi tulun Kadazandusun do mongingintong noopo (mere spectators) om mokikinongou noopo (mere audience) montok toinsanan abaabayan i posolimboon do astro. Soira ma kopio kiharo abaabayan doung Kadazandusun do sumolimbou id astro?
Koiso nopo abaabayan poingalib kosudong kopio do posolimboon daa id astro montok tinaru Kadazandusun nga iri no susuminding Kadazandusun pokitonon daa yolo mamaso suminding miampai sinding ngawi sinding i nosupu id roiton (lyrics) om lonoi (melody) tumanud do lonoi doung kadazandusun, nga okon ma ko lonoi joget toi ko dangdut tu lonoi do dangdut om joget okon ko lonoi koubasanan do tulun Kadazandusun. Au nogi doti asanangan ii tinaru sanganu lonoi joget om dangdut dino nung gunoon do susuminding Kadazandusun id koponupuan om kopodsindingan sinding kadazandusun miampai aiso kasagaan mantad di sanganu.
Ogumu tulun kadazandusun om tinaru suai lolobi om komulakan ngawi arahi mintong susuminding kadazandusun modsinding tu misondikot do ointangan diolo id astro tv. Nung haro abaabayan miagal dilo pointantu ogumu mongingindapu tagayo arahi sponsor abaabayan kopodsindingan susuminding kadazandusun mantad no do ogumu kounalan aanu diolo mantad mongingintong. Kosoruon daa papaharo abaabayan suminding susuminding kadazandusun i pohoroon id KDCA i oyuon do Popotunud KDCA sondiri. Tusin otimung gunoon do papagayo lamin titimungan (KDCA Community Hall) dino moi do ogumu tulun korumpos suai tadau soira haro ababayan i kopotinong tulun togumu mintong. Susuai ko papaharo abaabayan hilo KDCA, kinoyonon Nunuk Ragang nogi nga milo silihon do longkod pogkuamaan do tulun Kadazandusun. Minog kopio do haro walai tagayo oworun do tulun Kadazandusun hilo Nunuk Ragang.
Timpu baino diti, ginayo titimungan dilo au ogumu korumpos tu nokoinggumu nodi mongingintong id pogun diti. Soboogiyan tusin opuu mantad kopodsindingan dino patahakon di susuminding. Susuminding dino ounsikou tomod id ginawo miampai kaanu agab om gaab monginsonong ralan kopodsindingan dau om monupu sinding kadazandusun togumu. Timpu dii do kotonu (become popular) nodi susuminding Kadazandusun id pogun diti om id sompogunan nogi.
Do naamot diti, unsubon om angatan daa o toinsanan tulun Kadazandusun, au intangan hinonggo watas kinoyonon diolo do siwaton no daa popouni radio om mokinongou koposolimbaan boros Kadazandusun id Radio VFM i uludon sondiri do DJ Kadazandusun. Pokionuon nogi daa ngawi puru pulitik Kadazandusun do monokodung do sunduan diti.