Honorsius minongoi kakap mogigizon Pohon Batu, Labuan
LABUAN: Kinoikatan di Gundohing Honorsius Datuk Alfred Bosuin doid Kg Pohon Batu, pikiikio do 15 kilometer mantad kakadazan doiti notoimo miampai kounsikaan om kahangadan id piahatan pikiikio do 100 tuhun nokotindapou.
Kinoikatan di Honorsius sabaagi do Huguan Kopoihaan, Parti Warisan Sabah nopo diho nga naambit do mogigizon miampai minokinongou pononsunudan dosido kokomoi pinggisaman parti diho om minanaak po nogi kavagu do kointahangan kaa’ait do Pinidondian Malaysia 1963.
“Zotokou nopo diti nga iso ih haid sinompuuvan sabaagi mogigizon id siibo do kopomolintaan pogun Sabah om sundung nadadi oh Labuan sabaagi Tana Pisompuuvan nga kakal do tuhun Sabah manaak kopodulian,” ka di Honorsius.
Pinisaamaan au napalan nopo diho nga binuu’an di Huguan Monguhud Warisan Labuan, Salim Abdul Rahman miampai tinoina di poniikoon PDM Pohon Batu, Madjin Haji Ali.
Poingampai nogi potindapou do ontok diho oh piipio buu’an parti doid Labuan miaga di George Elias, Herold Lim, Julius Elias om Allan Roslan.
Id pason kotimpuunon, noboos di Salim do polinta Sabah nopo nga kakal ogumu oh kotos doid Labuan om avasi nodi daa kozo do otoina oh kotos pongindopuan ngavi dii mongoi kapanaak nodi do kounalan pakalajaan kumaa mogigizon.
Naamot diho, id pason ponuau-suau di Madjin, agazo kozo kahansanan dosido do kivaa kosimbanon doid Labuan miaga no koozo do kosivatan kalaja om nogi kounalan pongindopuan mongoi do ohumaag po di oh pogigizon do tuhun ngavi doid Labuan.
Mogigizon id Pohon Batu nopo nga notinagas do tuhun Brunei om Kedayan miampai nosompipi do mamasok Islam.