Pakakaraja tulun ginumuan kotumboyo miampai ganjaran tusin nung poporuput susuap: Sazali
TAWAU: Pakakaraja tulun ginumuan ih poporuput do kes susuap kumaa Tinan Monorina Pomunsaan Susuap Malaysia (SPRM koponorimo do koponumboyaan okitonan ‘insentif’ tusin tunui ih iso’i miampai gatang susuap ih patahakon, ka di Potunud SPRM Sabah Datuk Sazali Sabli.
Minoboros isio do ganjaran dilo patahakon miampai kooturan sokiro ko kes dilo soriukon om natandasan dawaan om katantu do kasalaan.
“Id Sabah di toun nakatalib haro duo noh pakakaraja tulun ginumuan ilo nopo nga pakakaraja imigresen om pulis nokotorimo ganjaran kalapas pinoporuput do kes susuap id pogun diti, om toun diti kiharo songulun (pulis) gisom baino diti koponorimo do ganjaran kigatang RM25,000 ih maan patahako ontok toyn tabantalan.
‘Insentif’ osuriba kopio ih patahakon nopo nga RM500 montok kes susuap id suriba gatang RM500, nga kes susuap kopoompit do gatang kolobi do RM500 baraian ‘insentif’ tumanud gatang pinonuapan,” ka dau.
Noboros disio ahal dilo ontok minanahak do boboroson id doumbangan kiikira 105 pakakaraja Koupisan Koporijistaran Pogun (JPN) Tawau kopinamot abaabayan tumaru om sumain tumaru koidu susuap (IBR) JPN Zon Tawau om Sandakan songowian SPRM hiti koniab.
Abaabayan dilo notindapou nogi di Potunud JPN Sabah Datuk Ismail Ahmad hiti koniab.
Minoboros ih Sazali do ganjaran dilo montok mongunsub do pakaakaraja tulun ginumuan poporuput do kaparagatan susuap om nogi montok momunso do susuap nokomoi do pakakaraja tulun ginumuan id pogun diti.
Namot dilo, isio ontok romuto minoboros do kiginumu 53 agensi porinta om tinan ‘berkanun’ id Sabah pinopouhan do IBR om asil dilo kaanu mongingkudi do paratusan pakakaraja tulun ginumuan koompit susuap.
Pinosorou disio o tulun ngawi ih tuminaru IBR montok popokito do ‘komitmen’ sompori-pori sabaagi laang montok minsodu susuap.
“Kada tumaru sabaagi ‘wayang’ noopo sabap ih oikuman nung agakom nopo nga agensi om tinan sondiri,” ka dau.
Tumanud Sazali, gisom toun diti tolu pakakaraja tulun ginumuan id Sabah tuminaru IBR tinaan kalapas nokoompit susuap. -Bernama