UPSR potilombuson - Mahdzir
KOTA KINABALU: Montiri Balajaran, Datuk Seri Mahdzir Khalid minoboros do Poniisan Kopodimpotan Sikul Tosuriba (UPSR) maan potilombuso gisom orikot timpu ih kangaam montok ilo alanan miampai sistom suai.
Minoboros isio do ponoriukan montok mongilo sistom ih kangaam kakaal papanaon ih kopoompit do mogisusuai bogian haro kogunoon kaamung noh molohing.
“Maan potilombuso UPSR gisom asalasai tokou (mogiboboros miampai toinsanan bogian). Karaja ngawi diti anaru (maganu timpu di alaid). Karaja ngawi miampai molohing, profesional, kosompuruan, puru akademik, koinsasanai mositi mirikau songowian.
“Okon asanang nung muhang momonsoi nuununu ih kobilangan diti (mongolon UPSR). Om UPSR kapanau gulu gisom (orikot) timpu ih kangaam alanan tokou,” ka dau kumaa monunurat abar.
Kuminakap isio Sikul Kabansaan Sri Gaya hiti montok mongintong pindalanan UPSR ih tumimpuun id pointongkop Sabah koniab.
Nokotindapou nogi ih Boyoon Monunurat Komontirian Balajaran, Datuk Seri Alias Ahmad, Boyoon Potunud Koupisan Balajaran, Tan Sri Dr Khair Mohamad Yusof om Potunud Balajaran Sabah, Datuk Maimunah Suhaibul.
Kiginumu 443,794 calon UPSR id pointongkop pogun kaamung kiikira 44,000 id Sabah mirikau poporiksaan dilo ih ginumu dino nokomoi kiginumu 433,536 susumikul nopo nga calon sikul sakadai porinta om noolu dilo nopo nga calon sikul misosondiri.
Namot dilo noboros di Mahdzir do ruputan kinodimpotan susumikul
Toun 6 montok toun diti maan wonsoyo miampai ‘holistik’ kopoompit do okon noopo ahal ‘akademik’ toiko koputusan UPSR, katapi nogi ahal ‘kokurikulum’, momogonop tinan, sipoot om susuai poh id suriba ‘Pentaksiran Berasaskan Sekolah’.
“Om markah montok sosongulun susumikul dilo okon noopo idsuang ‘akademik’. Intongan tokou nogi kinodimpotan susumikul dilo miampai ‘holistik’. Sabap dilo noh mongingia mositi manahak (markah) id sikul,” ka dau.
Tumanud dau, kapamagatangan dino nokomoi nopo nga montok kogunoon susumikul sondiri soira popolombus iyolo do balajaran doid bogian lobi akawas tiinu.
Id Negeri Sembilan, Kumoduo Montiri Balajaran, Datuk Chong Sin Woon minoboros do 16,609 calon id pogun dilo nogi kopoompit 10 tulun ih mirikau poporiksaan id lamin pongusapan om 13 calon haro kogunoon poimbida miagal au atarang pongintongan, olunggui winakas di mogisusuai om haro kobolingkangan pambalajaran om kaparangaan.
“Calon haro kogunoon poimbida onuan timpu pomoruhangan 30 minit gisom sojam tumanud karatas ih rikohonon,” ka dau kalapas pinapaharo do kakapan doid Sikul Kawo Kabansaan Sina Kampung Bharu Broga, Lenggeng.
Id Selangori, Potunud Balajaran Pogun, Mohd Salleh Mohd Kassim minoboros do sabaagi laang miingat-ingat montok tumoguang lumiud doti, sikul ih nokoompit miampai UPSR pokionuon popoiyon do longkod poporiksaan id tampat lobi akawas.
“Toinsanan sikul doulu noh ih koligogon antakan lumiud nosuhu noh popoiyon longkod poporiksaan sokurangkurang id louting iso (sikul) sabaagi laang miingat-ingat,” ka dau.
Id Pulau Pinang, Potunud Balajaran Pogun, Shaari Osman minoboros do intongan do bogian dau o koyuon liud ih nantakan id Jawi (Seberang Perai Selatan) om gisom baino aiso calon nokotoguang kobolingkangan. -Bernama