Ralan noliudan, puru bomba minonulung pinapaatod karatas ponguhatan UPSR id sikul
PAPAR: Sabap ralan nalabpaian waig liud, sontimungan puru mantad Balai Bomba om Manampasi (BBP) Papar pinapaharo do abaabayan monulung pinapaatod karatas ponguhatan Poniisan Kopodimpotan Sikul Tosuriba (UPSR) kuminaa id Sikul Kabansaan (SK) Sumbiling Bongawan, hiti di tadau Koduo.
Boyoon BBP Papar Janil Jaya minoboros do bogian dau pinapanau karaja dilo sumusuut Ralan Bongawan Estate, ilo nopo nga ralan tagayo pakaayan id sikul dilo au awayaan do padsakaian tokoodo.
“Montok papatantu do susumikul kaanu papanau do poporiksaan UPSR miagal toririmo, minonulung puru tokou pinapaatod do karatas ponguhatan kuminaa id SK Sumbiling minomoguno do korita 4WD sanganu Borneo Samudera.
“Winoyo nogi o puru tokou di walu mintamong poporiksaan kaamung mongingia sikul minaya ralan pomoting id kabun piasau mamau rumikot id sikul dilo,” ka dau.
Minoboros isio do apat upisor mantad Upis Balajaran Watas (PPD) om mongingia sikul di au nakaanu minaya ralan dilo sumusuut nalabpaian waig liud kiikira apat meter sansagan suminakai lori Palm Truck songowian piipiro puru pulis om bomba ruminikot id sikul dilo.
Tumanud dau kaparagatan dilo pinapanau di walu puru bomba songowian agensi suai kamaung pulis mantad Balai Bongawan, Balai Polis Papar, Sabah Electricity Sdn bhd (SESB) om staf Borneo Samudera.
Namot dilo, Kumoduo Potunud Angkatan Pertahanan Awam Malaysia (APM) Sabah Leftenan Kolonel (PA) Mohd Izaimi Md Daud minoboros do duo kampung id Beaufort noliudan nogi.
Kampung ih noliudan kaamung noh Lingkungan Laut om Lingkungan Tengah. Poingkuro po nga aiso poh longkod kopowolihan di nukaban sumusuut koyuon liud ih kakaal id koyuon atamangan.
“Skuad Delta ih pakaraja id tampat nongoliudan nogi pinapanau do ‘Operasi Payung’ id Sikul Kabansaan (SK) Lingkungan ih nokoompit kapangatadan kiginumu 18 susumikul om 12 mongingia,” ka disio.