10 lamin nakalaid noh id Tenom insanangan do Koporintaan Pisompuruan - Radin
TENOM: Kiginumu 10 tinan lamin nakalaid noh sanganu paganakan mosikin kopio id potitikid watas Sabah maan umbosiai id suriba Abaabayan Sakadai Mongumbasi Lamin Nakalaid mantad koporintaan Pisompuruan ontok toun diti, ka di Montiri Kotundaan Labus Kakadaian Datuk Seri Panglima Radin Malleh hiti.
Ka disio, koponguhanan abaabayan dilo maya do Upis Kotundaan Pisompuruan Sabah ponokotanda do kikosianan om ‘komitmen’ porinta montok popoingkawas do kolumaagan rayat id watas labus kakadaian.
“Koponguhanan abaabayan monginsonong lamin nakalaid dilo katanud miampai mamatos oku koporintaan Barisan Nasional (BN) montok popoingkawas do kolumaagan tulun ngawi labus kakadaian id pogun diti doulu noh id Sabah,” ka dau kalapas pinapatahak do sakadai abaabayan monginsonong lamin nakalaid paganakan mosikin kopio id Kampung Makakumpai om Skim Lembaga Industri Getah Sabah (LIGS) hiti di tadau Minggu.
Iyolo ih nokotorimo sakadai dilo kaampai noh id Vui Nyun San om Ana Angkatan mantad Kampung Makakumpai om Kapit Gaya mantad Skim LIGS, Tenom.
Tolu ponorimo sakadai dilo nopo nga id pialatan 10 paganakan mosikin kopio id watas Tenom ih nokosurat id abaabayan dilo mantad porinta.
Radin ih nogi Puru Lamin Koundangan Pogun (ADUN) Melalap minoboros do karaja mongumbasi 10 lamin nakalaid id watas diti wonsoyon miampai pogitatabangan torinaon do Koupisan Pisompuruan Pogun om Pironitan Kabansaan (JPNIN) watas diti miampai pinisokodungan Kawasan Rukun Tetangga (KRT) om mogigion id kampung dilo.
“Alansankopiookudoabaabayanditikotilombus papanaon do koporintaan Pisompuruan sabap ilo kaanu papagaan kawagatan tinimungan mosikin montok monginsonong lamin diolo.
“Kaandangan om sokodung rayat popomilo do porinta papanau do abaabayan ngawi kopotundaan montok popoingkawas do kolumaagan rayat id pogun diti,” ka dau.
Kawagu dau, kinalantayan kotundaan id bogian labus kakadaian kopoompit do pisokodungan om sokodung rayat doulu noh Tinan Koburuon om Koumoligan Kampung (JKKK) om KRT id bogian dilo.
“JKKK om KRT kitonggungan monulung porinta montok mongintong kobolingkangan rayat om poporuput kumaa upis watas, Unit Momuruan Kotundaan om koupisan porinta tuh kopomonsoi laang sumusuut montok monulung rayat di nokoompit,” ka dau.