Projik winakas ‘solar’ kikagarasan 2 MW id Kudat nokotimpuun noh papanau kotorinaan: Ongkili
KUDAT: Rontob koiso kopoingkawasan winakas ‘solar’ kikagarasan 2 megawatt (MW) id Lausan, doros hiti nopongo noh om tumimpuun papanau kotorinaan koniab.
Montiri Winakas, Teknologi Otomou om Waig Datuk Seri Dr Maximus Ongkili minoboros do ‘Loji Jana Kuasa Solar 2MW’ dilo nopo nga wookon mantad 50MW masaon papanaon id Sabah.
Noolu dilo kiginumu 48MW nopo nga pokimamaan montok momodimpot Tadau Operasi Komersial (COD) kotimpuunon toun tabantalan,” ka dau kumaa monunurat abar kalapas pinotimpuun do pinoimaganan loji janakuasa solar Lausan koniab.
2MW mantad 50MW winakas ‘solar’ ih pinotunda di Tadau Energy Sdn Bhd dilo maan patahako doid Kudat Grid om noolu dilo kiginumu 48MW maan patahko doid suang kooluyungan kapangatadan montok pobobohogin pointongkop Sabah.
Minoboros Ongkili do watas Kudat ih kiharo id kotonobon Sabah, kiikira 190 kilometer mantad Kota Kinabalu, kangaam kopio montok osiliu longkod winakas obuli inwaguan sabap watas dilo koponorimo babang tadau poingkakawas om toririmo anawau tadon ino do kangaam kopio montok kopoingkawasan winakas ‘solar’.
Minoboros isio do suai ko kotundaan winakas ‘solar’, popotounda nogi o bogian komontirian do projik winakas tongus id Kudat.
“Kudat nogi haro kobulihan di akawas id kotundaan winakas tongus om kaanu doti popoingkawas lobi 300MW. Nga ponoriukan miampai tosorisid kokomoi do projik dilo kiguno kopio wonsoyon pogului ino do papanaon,” ka dau.
Ontok timpu ih iso’i, noboros di Ongkili do kiagat o bogian dau montok poposiliu Kudat sabaagi longkod pnoriukan winakas obuli inwaguan ilo nopo nga ‘solar’ om tongus id pogun diti.
“Owiton ku ahal diti id pogibabarasan miampai montiri ngawi ASEAN ontok wulan diti nogi id Manila. Okuudi ogumu pogibabarasan kokomoi do ahal diti nowonsoi noh songowian bogian misosondiri.
“Ahal diti nopo nga osonong kopio id suang koingkokoton winakas obuli inwaguan id Malaysia om ilo nogi kopokito do tonggungan tagayo Sabah idsuang kotundaan bogian dilo id pogun diti,” ka dau. -Bernama