IBR poguluonon do UiTM
# Mongilag kantakan taraat susuap om kasala momoguno kuasa
KOTA KINABALU: Universiti Teknologi Mara (UiTM) poposiliu do Tumaru Koidu Susuap (IBR) sabaagi poguluonon di pointantu montok tumaru mantad potitikid pakakaraja kawawagu om susumikul kawawagu universiti dilo.
Rektor UiTM Raan Sabah Prof Madya Datuk Dr. Abdul Kadir Rosline minoboros do laang dilo nopo nga montok papatantu do UiTM kotilombus koidu mantad kaparagatan susuap okon noopo kumaa pakakaraja nga montok tinan sondiri nogi.
“Ounsiou tokou sabap ngaran tosonong UiTM ih koidu mantad nunu noopo kaparagatan susuap om montok popotilombus do ngaran tosonong kinangayan tosonong diti silihon tokou doti IBR sabaagi poguluonon kopio toiko onuan pongintongan tototopot universiti ih papanaon di potitikid pakakaraja om susumikul ngawi,” ka dau.
Noboros disio ahal dilo id Abaabayan IBR id Dewan Tun Mustapha Ujana Sarjana UiTM Sabah koniab.
Nokotindapou nogi ih Potunud Tinan Monorina Pomunsaan Susuap Malaysia (SPRM) Sabah, Datuk Sazali Salbi.
Minoboros isio do sundung pia IBR nakapanau noh miampai kitimungan id UiTM ih notindapou kiginumu kiikira 360 pakakaraja Kota Kinabalu om Tawau nga ahal diti nopo nga tonggungan pakakaraja tulun ginumuan.
“Montok mongilag do aiso pakakaraja tokou ih otoliban mantad IBR diti papanaon tokou IBR miampai kotilombus kumaa pakakaraja om susumikul kawawagu ih sumuang UiTM.
“Susumikul kawawagu ih pogului diti mositi montok mambasa tumaru UiTM nogi doti mambasa IBR ontok timpu ‘iso’i do tiinu,” ka dau.
Kawagu dau ahal diti nogi okitonan sabaagi iso mantad laang ih ponokotanda do bogian diolo mokimaamaha do salaang kagu ‘komitmen’ montok au umompit id suang nunu noopo kaparagatan susuap toiko kasala momoguno kuasa id UiTM.
“Potilombuson tokoou kangai-angaian tosonong UiTM sabaagi iso tinan di koidu susuap maya kopomuruanan om ‘komitmen’ takawas ih tumimpuun mantad bogian sawat universiti,” ka dau.
Namot dilo minoboros Sazali do papaharo o bogian dau do pirubaan songowian media soira orikot timpu om timpu ih kangaam montok poposunud do kinagakaman kopoompit do kaparagatan susuap ih pisosoromo Oktober tabantalan.
“Gisom baino diti papanau karaja montok mogowit nakasala ih noilaan noh doid kapangadilan au poluntanon nga tokou baino manahak liwang kumaa pangaramitan 50 toun SPRM maya abaabayan ‘Kembara Jelajah Anti Rasuah’ (Kejar) ih romiton id pointongkop Malaysia tumimpuun 17 September diti.
“Kejar papanon id Sabah ontok 23 September diti ih ampayaton di 40 motosikal kikuasa takawas ih maan poiduo id Kota Kinabalu gisom doid Sindumin Sipitang.
“Poompus abaabayan pohoroon tokou rumuba miampai tulun ngawi montok manahak kopurimanan om kopointalangan kokomoi kaparagatan susuap sabaagi laang montok mongingkudi kaparagatan dilo,” ka dau.