Mongindapu kinoiyonon minog sumiliu momuruan ‘teknologi’
TAWAU: Mongingindapu kinoiyonon id pogun diti minog kopio papatantu do sumiliu iyolo sabaagi momuruan ‘teknologi’ montok kotilombus koponokialit om ‘relevan’ id suang dagang.
Panakadai Montiri Kotundaan Kotos om Koburuon Teknologi Kopoilaan Datuk Hamisa Samat minoboros do mongingindapu kinoiyonon minog sumiliu ‘perintis’ kopoingkawasan teknologi om okon ko maganu laang montok tutumanud noopo.
“Nung muhang tokou kotilombus koponokialit om relevan, mositi simbanan pomusarahan tokou. Nung pogului diti tokou sabaagi momomoguo teknologi noopo, nga baino tokou mositi monunupu kumaa ‘teknologi’ dilo sondiri,” ka disio.
Noboros disio ahal dilo ontok pinotimpuun do ponutuban Klinik Aplikasi teknologi idsuang Kopongindapuan (TECh) nayatan watas Tawau id Longkod e-Desa Tanjong Batu, Tawau di tadau Kaapat.
Kiginumu 22 tulun uminampai klinik tolu tadau dilo kaampai mantad komulakan (tondu/kusai) ngawi mantad posorili Tanjong Batu.
Abaabayan dilo nopo nga pinanjur do Komontirian Kotundaan Kotos om Koburuon Teknologi Kopoilaan miampai Koisaan Mongindapu Teknologi Sabah (SATA).
Tumanud Hamisa ih nogi ADUN Tanjong Batu minoboros do pogun Malaysia nakapanau om tumilombus papanau do ‘ekonomi’ poingukab om ralan tonudon labus sabaagi laang montok popoingkawas do koponupuan ‘teknologi’ om ‘inovasi’ wagu.
“Poniagaan maid-laid sumimban mantad kapasanganuan harat kakamot, miagal ih nintongan id ‘grab’ om ‘aplikasi’ asanag papawaliu ih suai.
“Mantad dilo, mositi kotorimo tokou ponimbanan om sumiliu lobi poingukab idsuang pomogunan ih maid-laid sumimban,” ka disio.
Pinatarang disio, toririmo porinta minggisom mogium kosiwatan minsingilo do mogisusuai ilimu wagu ih pinointutun di ICT.
“ICT kaanu papawakas om monimban kopoposion montok lobi ogirot om kigatang akawas idsuang pomogunan aiso piwolitan.
“Miampai kinoinggumuon ICT diti, kada noh haro bogian momoguno dilo montok momonsoi ahal di au olidas toiko papaatod ahal ngawi au atantu om nogi kopomiraag ngaran om korikohonon pogun,” kawagu di Hamisa.
Kokomoi kapangalapusan garis alaab diti, pinosnud di Hamisa do ontom timpu diti nokosigampot noh 72.4 paratus giso Jun 2016.
Toririmo Koporintaan Longkod minggisom tuh paratusan kodimpotan diti kaanu popoingkawas kagu mooi rayat Sabah kaanu monokialit miampai tulun ngawi montok kopomogunaan IT.
“Kinopohoroon Longkod e-Desa, Longkod Internet 1Malaysia om kampung aiso wayar id bogian labus kakadaian nopo nga pialatan laang koporintaan pogun om Koporintaan Pisompuruan montok popoingkawas do rontob kapangalapusan garis alaab (jalur lebar).
“Watas Tawau noopo kiharo noh duo Longkod e-desa mantad Komontirian Kotundaan Kotos om Koburuon Teknologi Kopoilaan mantad podi 2009 poh.
“Abaabayan TECh nokotimpuun noh mantad podi toun 2014 om toun diti nopo nga toun ko-4 om abaabayan diti induo noh pinaharo id Tawau,” ka dau.