MINSINGILO BOROS KADAZANDUSUN APASI BOROS, APASI TINARU
BOROS Kadazandusun agaras do gunon id pibarasan om koponuratan miagal boros tinaru suai. Iso kagarasan tagayo boros Kadazandusun nopo nga momoguno Ponurat (Letters) do Roman Alphabets do poposurat.
Boros Singkung om susuai, momoguno noopo do Ponurat Characters, au momoguno Ponurat Roman. Ponurat Characters nopo nga poingalib do apagon do osingilaan tulun Kadazandusun. Mantad no dino do nung haro o boros tinaru sondiri i asanang do osingilaan i ginuno ponogi do gulu-gulu tokou, nokuro tu au tokou tomposion boros dino id pialatan tulun tokou timpu baino diti id pogun diti do mogiturubung do naamot tokou poingamung do tinaru mogisusuai ih somporipori nogi moboros id boros tinaru diolo?
Intangai tulun Sina om India, au yolo asaga atagakan do boros tinaru. Tulun Malaya no i poingalib ologod sunduan id pomogunan diti do mamasi boros tina. Boros ka diolo, “boros rusod do tinaru,” ka.
Tinaru Kadazandusun minog do momit sunduan suai do manampasi boros tinaru sondiri tu boros tinaru no o kointutunan do tinaru. Sumusuhut diti nopo nga iso nuludan piipiro boroson (words) Boros Kadazandusun i tumimpuun do Ponurat Roman “P”, i nonuan do rati id Boros English.
Nung basaon nu sontob boros Kadazandusun i nokosurat toi ko posuraton id surat abar tikid tadau, minggumu daa toilaan nu moboros boros tinaru sondiri. Id walai panambayangan id labus kakadayan om id kakadayan, milo suhuon nu tangaanak songinsikul do mambasa di buuk panabambayangan i nokosurat id boros Kadazandusun. Nung okon ko miagal diti, aiso no ralan tapantang do manampasi boros tinaru. Kopisanangan do mambasa.
Nulud di Tatak Barambang