Tiyonon PTI sinugkuan
# Pulis minonugku siam pongiyanan, 20 tulun Filipina tinaan
KOTA KINABALU: Kiginumu siam tampat pongiyanan modidikot aiso kasagaan (PTI) sinugkuan maya ‘Operasi Bersepadu’ hiti di tadau Minggu.
Boyoon Pulis Watas Kota Kinabalu Asisten Komisioner M.Chandra minoboros do operasi dilo kopoompit do bogian Manggatal, Inanam, Luyang om kakadaian tagayo.
Tumanud dau, kiginumu 20 tulun Filipina ginakom id operasi ih pinapanau tuminimpuun jam 1 gisom 10 kosuabon dilo.
Ka dau, pongiyanan di sinugkuan kaamung noh Taman Bunga Dahlia Lido Luyang, lami aiso kasagaan Bukit Padang, lamin kongsi id Taman Khidmat Luyang, lamin kongsi tohuri Metro Town Luyang, om lamin aiso kasagaan id suriba bogian Lamin Koundangan Pogun (DUN).
Suai ko ilo ka dau, pinorisa nogi lamin kongsi Eco Park Manggatal, lamin ‘aiso kasagaan (setinggan) Kampung Lokob Manggatal, lamin ‘setinggan’ Kampung Lobou Tebobon, om lamin ‘setinggan’ id Bukit nenas.
“Koinsanai kinagakaman kiumur id bindurugan sontoun gisom 58 toun kamaung siam kusai, apat tondu om turu tangaanak.
“Pulis kalapas dilo minogowit koinsanai PTI ih nagakom kuminaa id lokap kilongkod kalapas pinorisa ‘dokumen’ id Longkod Upis Pulis Watas (IPD) hiti,” ka dau hiti.
Minoboros isio do poompus operasi pinapanau, kiginumu 56 tulun pinorisa kopoompit do 53 tulun Filipina om tolu tulun Indonesia.
Minoboros Chandra do pongintongan tiyonon pinapanau do operasi dilo montok kopomunsaan koimaan taraat id bogian di ogumu kopio rontob koimaan taraat.
Ontok timpu iso’i ka dau, tiyonon dilo nogi noilaan do sabaagi rumun tulun taraat om kapatayadan dadah doulu noh bogian Manggatal, Inanam, Kota Kinabalu om Luyang.
Operasi dilo nogi kopoompit do pinanandaan lamin ngawi mantad Dewan Bandaraya Kota Kinabalu (DBKK).